Fiqurlu konkisürmə üzrə yeniyetmələr arasında Qran-pri seriyasının mərhələləri bu günlərdə Polşada başa çatmaq üzrədir. Azərbaycan yığması da turnirlərdə çıxışlarını artıq tamamlayıb.
Azərbaycan təmsilçisi kimi debüt edən Aleksandr Plyuşenko Batumidə keçirilən mərhələdə 13-cü, Ankaradakı yarışda isə 10-cu yeri tutub. Həmçinin Sofiya Beznosikova və Maks Leleudan ibarət rəqs cütlüyü Sloveniyada 4-cü olub. Bundan başqa, Qran-pri mərhələlərində Arina Kaluqina da çıxış edib. O, Ankarada 17-ci, Batumidə isə 14-cü yeri tutub. Anna O'Briyen və Dreyk Tonqdan ibarət rəqs cütlüyü isə hər iki mərhələdə 12-ci yeri tutub.
Azərbaycan Qış İdman Növləri Federasiyasının baş katibi Günel Bədəlova İdman.Biz-ə müsahibəsində yeniyetmələrdən ibarət yığmanın çıxışlarını dəyərləndirib, həmçinin Plyuşenkonun debütü zamanı Azərbaycan azarkeşlərinin narazılığına səbəb olan mübahisəli məqama münasibət bildirib.
– Yeniyetmələr arasında Qran-prinin mərhələlərində fiquristlərimizin çıxışlarını necə qiymətləndirirsiniz?
– İlk növbədə Azərbaycan yığmasının yeni üzvü Aleksandr Plyuşenkonun debütünü qeyd etmək istərdim. Bunun onun ilk beynəlxalq yarışları olduğunu nəzərə alsaq, hesab edirik ki, yaxşı çıxış edib. Artıq Qran-prinin ikinci mərhələsində həm birbaşa çıxışında, həm də yekun qiymətlərində müsbət dinamika gördük. Buna görə də onun çıxışlarını uğurlu adlandırmaq olar. Gələcəkdə onun irəliləyişinə və nəticələrini yaxşılaşdıracağına ümid edirik.
Arina Kaluqinanın məşqlərdə nümayiş etdirdiyi səviyyəni nəzərə alaraq, təbii ki, ondan daha yüksək nəticə gözləyirdik. Lakin bu, yalnız mövsümün başlanğıcıdır. Buna görə də növbəti yarışları gözləyirik və ümid edirik ki, Arina həmin turnirlərdə imkanlarını tam şəkildə nümayiş etdirə biləcək. İdmançının özü də üzərində nələr üzərində işləməli olduğunu başa düşür.
Buz üzərində rəqslərə gəlincə, Azərbaycan cütlükləri yeniyetmələr arasında Qran-prinin Türkiyə, Gürcüstan və Sloveniya mərhələlərində çıxış ediblər. Xüsusilə yeni cütlüyümüz Sofiya Beznosikova və Maks Leleunın Sloveniyadakı çıxışını qeyd etmək istərdim. Beynəlxalq yarışlarda bir illik fasilədən sonra 4-cü yeri tutmaları çox yaxşı nəticədir. Bu idmançılardan böyük gözləntilərimiz var. Hesab edirik ki, onların ciddi potensialı və gələcəkdə mükafat uğrunda mübarizə aparmaq üçün yüksək şansları var.
– Azərbaycanda Aleksandr Plyuşenkonun “kiss & cry” zonasında Azərbaycan yığmasının geyimi əvəzinə Yevgeni Plyuşenko akademiyasının gödəkçəsini geyinməsinə diqqət yetirildi. Daha əvvəl Azərbaycan yığmasının üzvü Veronika Jilina da böyüklər arasında keçirilən yarışda belə hərəkət etmişdi. Bu vəziyyətə münasibətiniz necədir?
– Bütün idmançılarımız Azərbaycan yığmasının geyimlərindən istifadə edirlər. Onlar yarış və çıxışlardan əvvəl bu geyimlə buz üzərinə çıxır, həmçinin məşqlərdə iştirak edirlər.
Bununla yanaşı, “kiss & cry” zonası idmançılara, o cümlədən sponsorlarını təqdim etmək imkanı verir. Aleksandr Plyuşenko və Veronika Jilinanın sponsorlarından biri “Sea Breeze” olduğuna görə, idmançılar sponsorlarını təqdim etmək istəyiblər və buna görə də həmin zonada müvafiq gödəkçələrdə olublar. Bu məsələ əvvəlcədən federasiya ilə razılaşdırılmışdı.
– Azərbaycan qadınlar arasında böyüklərdə Jilina, yeniyetmələrdə isə Kaluqina öndədir. Bəs Nərgiz Süleymanova, Sabina Əliyeva və Leyla Axundova kimi azərbaycanlı fiquristlərə gəlincə, onların artıq yarışlarda çıxış etmək şansları daha azdır. Federasiya bu idmançıların inkişafının dayanmasının qarşısını almaq üçün hansı addımları atır?
– Biz, əlbəttə, idmançılarımızı dəstəkləməyə davam edirik və onların gələcək inkişafında maraqlıyıq. Ölkədə fiqurlu konkisürmənin inkişafı üçün yüksək nəticələr nümayiş etdirmək çox vacibdir və bütün idmançılarımıza eyni münasibət göstəririk.
Bununla yanaşı, idmanda azad və sağlam rəqabət mövcuddur. Ən mühüm beynəlxalq yarışlarda ölkəni hazırda yüksək nəticə göstərmək şansı daha çox olan fiquristlər təmsil edəcəklər. Bu, idman seçiminin təbii prinsipidir. Bununla belə, federasiya bütün fiquristlərimizin inkişafı və dəstəklənməsi istiqamətində işini davam etdirəcək.
– Federasiya mövsüm üçün fiquristlərin qarşısında hansı əsas vəzifələri qoyub?
– Bizim vəzifələrimiz yalnız bir mövsüm üçün deyil, bütün Olimpiya tsikli və hətta iki Olimpiya tsikli üçün nəzərdə tutulub. Əsas məqsəd ardıcıl şəkildə daha yüksək nəticələr əldə etmək, proqramları və idmançıların texniki ustalığını təkmilləşdirməkdir. Gələcək fəaliyyətimizdə məhz uzunmüddətli inkişafa, fiquristlərimizin irəliləyişinə və Olimpiya tsiklləri ərzində yüksək nəticələr əldə etməsinə istiqamətlənəcəyik.
