Azərbaycanlı döyüşçü Məhəmmədəli Osmanlı ilə Qırğızıstan təmsilçisi İlimbek Akılbekovun münaqişəsi Həbib Nurməhəmmədov və Konor Makqreqor arasındakı məşhur düşmənçiliyə bənzədilib.
İdman.Biz-in məlumatına görə, bu barədə “The Ultimate Fighter”in 34-cü mövsümünün iştirakçısı Ksyaver Franklin danışıb. O, hər iki döyüşçü ilə Maykl Bispinqin komandasında birlikdə çıxış edib.
ABŞ-li döyüşçünün sözçüsünün sözlərinə görə, Osmanlı ilə İlimbek Akılbekov arasındakı antipatiya həqiqi olub və televiziya kameraları üçün şounun bir hissəsi olmayıb.
“Onlar həqiqətən də bir-birlərini heç sevmirlər. Məsələ təkcə döyüşdən ibarət deyil. Pərdəarxası baş verənlər mənə sözün əsl mənasında Konorla Həbib arasındakı vəziyyəti xatırladır. Hər şey o qədər ciddidir ki, hətta tribunada onların ölkələrinin nümayəndələri arasında qarşıdurma baş verə bilər”, - Franklin “MMA Fighting”ə açıqlamasında deyib.
Qeyd edək ki, Həbib Nurməhəmmədovla Konor Makqreqor arasındakı münaqişə 2018-ci ildə, onların UFC 229-da keçirəcəyi döyüşdən əvvəl pik həddə çatmışdı. Qarşıdurma sərt "trash-tokinq", şəxsi təhqirlər və Makqreqorun Bruklində Nurməhəmmədovun komandasını daşıyan avtobusa hücum etməsi ilə bağlı qalmaqalla müşayiət olunmuşdu. Oktaqonda Həbib dördüncü raundda irlandiyalı rəqibini boğucu fəndlə məğlub edib. Bundan sonra hər iki komandanın nümayəndələrinin iştirakı ilə kütləvi dava baş verib. UFC 229 təşkilat tarixində ən çox satılan şou olub - yayım təxminən 2,4 milyon dəfə satın alınıb.
Osmanlı ilə İlimbek Akılbekov qarşıdurmasına qayıdarkən qeyd edək ki, ən gərgin epizodlardan biri döyüşçülərin birgə məşqi zamanı yaşanıb. Döyüşün parter mərhələsində İlimbek Akılbekov dirsəyini Osmanlının üzünə dayayıb. Franklinin sözlərinə görə, bu hərəkət daha çox "buggy choke" fəndindən çıxmağa cəhd zamanı müdafiə məqsədilə dirsəklə dayaq yaratmağa bənzəyib. Lakin azərbaycanlı döyüşçü bunu zərbə kimi qəbul edib.
Bundan sonra Osmanlı qəzəblənərək sparrinqi davam etdirmək üçün MMA əlcəklərinin geyinilməsini tələb edib. Məşqçilər əvvəlcə döyüşçüləri ayırmağa çalışsalar da, daha sonra onların məşqi davam etdirməsinə icazə veriblər. Həmin vaxt Maykl Bispinq özü zalda olmayıb. Franklinin sözlərinə görə, məşqdən sonra da gərginlik aradan qalxmayıb və münaqişə hətta soyunub-geyinmə otağında da davam edib.
ABŞ-li məşqçi heyətini də tənqid edib. O bildirib ki, Osmanlı ilə İlimbek Akılbekovun münasibətlərinə baxmayaraq, məşqçilər onları yenə də bir-birinə rəqib qoymaqda davam ediblər.
“İki canavar bir-biri ilə məşq edir. Onlar bir-birlərini sevmirlər. Onların birlikdə məşq etməsinə icazə vermək olmaz, çünki sözün əsl mənasında bir-birlərini sevmirlər. Biri nəsə edəcək, digəri cavab verəcək. Bu, ağılsızlıqdır”, - deyə o vurğulayıb.
İndi rəqiblər münasibətlərini artıq rəsmi döyüşdə aydınlaşdırmalı olacaqlar. Osmanlı və İlimbek Akılbekov sentyabrın 26-da Las-Veqasda keçiriləcək “UFC Fight Night: Rosas Jr. vs Barcelos” turnirində TUF 34-ün yüngül çəki dərəcəsində finalında qarşılaşacaqlar. Qalib şounun əsas mükafatını – UFC ilə altı rəqəmli müqaviləni əldə edəcək.
Qeyd edək ki, Osmanlı iki erkən qələbədən sonra finala yüksəlib. Əvvəlcə azərbaycanlı döyüşçü ilk raundda Artem Belaxı boğucu fəndlə məğlub edib, yarımfinalda isə Kristian Strong üzərində ikinci raundda nadir istifadə olunan "buggy choke" fəndi ilə qələbə qazanıb. Akılbek Uulu isə yarımfinalda məhz Franklinə qarşı döyüşdə hakimlərin qərarı ilə qalib gəlib.
İdman.Biz-in daha əvvəl xəbər verdiyi kimi, bununla yanaşı, hər iki finalçı üz-üzə gələcəkləri döyüşdən əvvəl artıq UFC-nin rəsmi heyətinə daxil edilib. Təşkilatın saytında Osmanlı “Active” statusu ilə göstərilir və onun oktaqondakı debütü kimi sentyabrın 26-da keçiriləcək döyüş qeyd olunub. İlimbek Akılbekov da eyni qaydada heyətə daxil edilib.
Beləliklə, həm azərbaycanlı, həm də qırğızıstanlı artıq UFC-nin aktiv döyüşçüləri hesab olunur. Halbuki “The Ultimate Fighter 34”ün qalibinə ayrıca altı rəqəmli müqavilənin təqdim ediləcəyi final döyüşünü onlar hələ keçirməlidirlər.
