Azərbaycanlı cüdoçu Balabəy Ağayev (60 kq) həmvətəni Əhməd Yusifovu qabaqlayaraq dünya reytinqində yenidən birinci pilləyə yüksəlib.
İdman.Biz xəbər verir ki, Beynəlxalq Cüdo Federasiyası (IJF) Əbu-Dabidə keçirilən Böyük Dəbilqə turnirindən sonra dünya reytinqini yeniləyib.
Xatırladaq ki, Birləşmiş Ərəb Əmirliklərinin paytaxtında Azərbaycan millisinin heyətində Balabəy Ağayev (60 kq) və Könül Əliyeva (48 kq) qızıl medal qazanıblar. Uşanqi Kokauri (+100 kq) gümüş, Rəşad Yelkiyev (66 kq) və olimpiya çempionu Hidayət Heydərov (73 kq) isə bürünc medala sahib olublar. Könül Əliyeva Böyük Dəbilqə turnirində qızıl medal qazanan ilk azərbaycanlı qadın cüdoçu olub. Millimiz isə medal sıralamasında birinci yeri tutub.
Əbu-Dabidəki qələbə Balabəy Ağayevə reytinqdə 1000 xal qazandırıb. Beləliklə, onun xallarının sayı 5473-ə çatıb və o, birinci pilləyə yüksəlib. Əhməd Yusifov isə 5355 xalla ikinci yerə düşüb.
Qeyd edək ki, Yusifov Bakıda keçirilən dünya çempionatında qızıl medal qazandıqdan sonra IJF reytinqinə başçılıq edirdi. Beləliklə, son aylarda kişilərin 60 kq çəki dərəcəsində liderlik uğrunda mübarizə yalnız iki azərbaycanlı cüdoçu arasında gedir.
Tarixi qızıl medal qazanan Könül Əliyeva (48 kq) reytinqdə yeddi pillə irəliləyərək 2541 xalla 16-cı yerə yüksəlib.
Uşanqi Kokauri (+100 kq) 5040 xalla dünya reytinqində ikinci pillədəki mövqeyini qoruyub. Bakıda keçirilən dünya çempionatının bürünc medalçısı, ötən həftəsonu 23 yaşadək idmançılar arasında Avropa çempionu titulunu ikinci dəfə qazanan Kənan Nəsibov isə 3920 xalla üçüncü yerdən dördüncü pilləyə enib. Camal Həmzətxanov 3290 xalla 11-cidir.
Olimpiya çempionu Hidayət Heydərov (73 kq) Əbu-Dabidə bürünc medal qazandıqdan sonra yeddi pillə irəliləyərək 2083 xalla 19-cu yerə yüksəlib. Bu çəki dərəcəsində Azərbaycan cüdoçuları arasında ən yaxşı göstərici isə 4528 xalla dördüncü yerdə olan Rəşad Məmmədəliyevə məxsusdur.
Əbu-Dabi Böyük Dəbilqəsinin bürünc medalçısı Rəşad Yelkiyev (66 kq) ən böyük irəliləyişə imza atıb. O, 14 pillə yüksələrək 1825 xalla 20-ci yerə çıxıb. Bu çəki dərəcəsində Azərbaycan təmsilçiləri arasında Ruslan Paşayev 3420 xalla altıncı pillədə qərarlaşıb.
Digər çəki dərəcələrində isə aparıcı azərbaycanlı cüdoçuların əksəriyyəti mövqelərini qoruyublar. Zelim Tçkayev (81 kq) 4536 xalla dünya reytinqinə başçılıq edir. Ömər Rəcəbli (81 kq) 3 647 xalla altıncı, Murad Fətiyev (90 kq) 3836 xalla üçüncü yerdədir.
Zelim Kotsoyev (100 kq) 2544 xalla 13-cü pillədən 15-ci yerə düşüb. Gültac Məmmədəliyeva (52 kq) isə 1773 xalla 24-cü yerdən 22-ci pilləyə yüksəlib.
