Gənclər və idman naziri Fərid Qayıbov bu il keçiriləcək Azərbaycan Qran-prisi ilə bağlı fikirlərini bölüşüb.
İdman.Biz xəbər verir ki, nazir bu barədə Bakı Şəhər Halqası Əməliyyat Şirkətinin mətbuat xidmətinə açıqlamasında danışıb.
F.Qayıbov yubiley Qran-prisinin Bakının Dünya İdman Paytaxtı olduğu xüsusi bir ildə keçirilməsinin əhəmiyyətini vurğulayıb:
“Yubiley Qran-prisi Bakının Dünya İdman Paytaxtı olduğu xüsusi bir ildə keçirilir. Azərbaycan Qran-prisi 2026-cı ilin əsas idman tədbirlərindən biri olmaqla, paytaxtımızın beynəlxalq idman mərkəzi kimi mövqeyinin daha da möhkəmlənməsinə töhfə verəcək.
“Formula-1”in əhəmiyyəti yalnız yarışla məhdudlaşmır. Qran-pri idman turizminin inkişafına təkan verir, yerli biznes üçün əlavə imkanlar yaradır və milyonlarla azarkeşin diqqətini Azərbaycana yönəldir”.
Nazir Azərbaycan Qran-prisinin ölkənin beynəlxalq nüfuzunun güclənməsində də mühüm rol oynayacağını bildirib:
“Qran-pri Bakının beynəlxalq nüfuzunun daha da güclənməsinə, Azərbaycanın zəngin mədəniyyətinin və idman imkanlarının dünya miqyasında tanıdılmasına töhfə verəcək. Bu yarış 2026-cı ilin ən yaddaqalan idman hadisələrindən biri olacaq”.
Qeyd edək ki, Azərbaycan Qran-prisi sentyabrın 24-26-da keçiriləcək.
