“Qarabağ”ın Lissabonda “Benfika” üzərində qazandığı sensasion qələbə dünyanın aparıcı idman mediasının əsas mövzularından birinə çevrilib.
İdman.biz xəbər verir ki, Sports.ru xəbər portalı Ağdam klubuna həsr olunan geniş material dərc edib.
16-cı dəqiqəyə 0:2 hesabı ilə uduzan və sonda parlaq qələbə qazanan (3:2) “Qarabağ”la bağlı 10 fakt təqdim edilib:
- “Qarabağ” Azərbaycan çempionatında 12 dəfə qızıl medal, 8 dəfə ölkə kuboku qazanıb. Son mövsümdə çempion olub, amma kubokun finalında “Sabah”a uduzub.
- Komandanın uğurlarının böyük hissəsi 2008-ci ildən “Qarabağ”ı çalışdıran Qurban Qurbanovun adı ilə bağlıdır. O, hazırda Azərbaycanın ən titullu baş məşqçisidir və Avropada uzunömürlü çalışdırıcılar sırasında yer alır.
- Bu qələbə “Qarabağ”ın Çempionlar Liqasındakı ilk zəfəridir. Klub 2017/18 mövsümündə də qrupda çıxış etmişdi və “Atletiko”nun iki dəfə xal itirməsinə səbəb olmuşdu.
- Azərbaycan çempionu mütəmadi olaraq avrokuboklarda iştirak edir. Ən böyük uğur 2023/24 mövsümündə Avropa Liqasının 1/8 finalına yüksəlmək olub. O vaxt rəqib məğlubedilməz “Bayer” idi.
- Hazırda “Qarabağ” UEFA reytinqində 55-ci yerdədir, “Benfika” isə onuncu. Ağdam klubu “Atletik”, “Nyukasl”, “Nitsa” kimi klubları geridə qoyur.
- Komanda ev oyunlarını Bakıda – Tofiq Bəhramov adına stadionda keçirir. Həmin Bəhramov 1966-cı il dünya çempionatı finalında İngiltərənin mübahisəli qolunu qeydə alan yan xətt hakimi kimi tanınır.
- Mövsümə isə çətin start verilib: “Qarabağ” hazırda Premyer Liqada 12 komanda arasında 7-ci yerdədir və cəmi 4 xalı var.
- Komandanın ən bahalı futbolçuları 2,5 milyon avro dəyərləndirilir. Onlardan biri – braziliyalı Kadi bir vaxtlar “Krasnodar”da da oynayıb.
- Ən təcrübəli oyunçulardan biri isə 2018-dən “Qarabağ”ın şərəfini qoruyan fransalı yarımmüdafiəçi Abdellah Zubirdir.
- “Benfika”nın heyətinin ümumi dəyəri 335 milyon avrodursa, “Qarabağ”ınkı cəmi 24 milyon təşkil edir. Amma bu dəfə meydanda büdcələr yox, əzmkarlıq qalib gəldi: Andrade, Kamilo Duran və Aleksey Kaşukun qolları 0:2 hesabını tarixi 3:2-yə çevirdi.
İdman.biz
