Futbol üzrə İspaniya millisində 2026-cı il dünya çempionatının qələbəsindən sonra anonim qəhrəman ortaya çıxıb. İddiaya görə, yığmanın futbolçularından biri çempionluğa görə nəzərdə tutulan təxminən 1,2 milyon dollarlıq bonusundan imtina edərək həmin vəsaitin İspaniya Futbol Federasiyasının əməkdaşlarına verilməsini istəyib.
Xatırladaq ki, İspaniya millisi iyulun 19-da Nyu-Yorkda keçirilən finalda Argentinanı 1:0 hesabı ilə məğlub edərək tarixində ikinci dəfə dünya çempionu olub. Qarşılaşmanın yeganə qolunu Ferran Torres 106-cı dəqiqədə vurub.
İdman.Biz xəbər verir ki, turnirdən əvvəl federasiya ilə futbolçular arasında bonus sistemi ilə bağlı razılaşma əldə olunub. Bu razılaşmaya əsasən, İspaniyanın dünya çempionu olması halında 26 futbolçunun hər birinə təxminən 1,2 milyon dollar bonus düşüb.
Lakin dünya çempionluğundan sonra futbolçulardan biri gözlənilməz qərar verib. O, öz bonusundan imtina edərək həmin pulun federasiyanın sıravi əməkdaşlarına çatmasını istəyib.
Futbolçu anonim qalmaq qərarına gəlib. O, bu addımı turnir boyunca komandanın hazırlığı və təşkilati işlərin arxasında çalışan əməkdaşlara minnətdarlıq jesti kimi qiymətləndirib.
Mənbənin məlumatına görə, futbolçu həmin insanların əməyinin komandanın uğurunda mühüm rol oynadığını düşünür. Onun fikrincə, məşqçilər və futbolçular meydanda görünən tərəf olsalar da, federasiyanın arxa planda çalışan əməkdaşlarının işi olmadan belə uzun və mürəkkəb turniri yüksək səviyyədə təşkil etmək mümkün olmazdı.
Beləliklə, futbolçulardan biri özünə çatmalı olan böyük məbləğdən imtina edərək onu komandanın uğurunda pərdəarxasında rol oynayan federasiya əməkdaşlarına bağışlayıb. O isə kimliyinin açıqlanmasını istəməyib və bu addımın sadəcə minnətdarlıq jesti kimi qalmasını seçib.
