“Mançester Yunayted” futbol klubunun hücumçusu Markus Reşford UEFA Çempionlar Liqasının əsas mərhələsində “Sabah”la keçiriləcək oyun ərəfəsində zədə alıb.
İdman.Biz xəbər verir ki, ingiltərəli futbolçu Premyer Liqanın “Everton”la matçının 70-ci dəqiqəsində özünü narahat hiss etdiyi üçün əvəzlənib. Görüş 2:2 hesabı ilə başa çatıb.
“Mançester Yunayted”in baş məşqçisi Maykl Karrik Reşfordun vəziyyətinin ciddi olmadığını bildirib.
“O, kiçik bir problem hiss etdi, ciddi bir şey deyil. Markus qayıtdıqdan sonra çox yaxşı görünür. Bu gün də sürətli və təhlükəli idi, yaxşı imkanlar yaradırdı və daim rəqib üçün təhlükə təşkil edirdi”, – mütəxəssis deyib.
Karrik “Everton”la oyunun nəticəsini də çox üzücü adlandırıb. “Mançester Yunayted” qarşılaşma zamanı iki dəfə hesabda önə keçsə də, matçın əlavə vaxtında ikinci qolu buraxıb.
“Bu, məğlubiyyət kimi hiss olunur. Əlbəttə, bir xal qazandıq və bunu nəzərə almamaq olmaz. Amma düşünürəm ki, bu oyundan daha çox xal götürməli idik”, – baş məşqçi bildirib.
Qeyd edək ki, “Mançester Yunayted” növbəti oyununu sentyabrın 10-da keçirəcək. İngiltərə klubu UEFA Çempionlar Liqasının əsas mərhələsinin ilk turunda Azərbaycan çempionu “Sabah”ı “Old Trafford” stadionunda qəbul edəcək.
