Fransızların baş məşqçisi “Kristal Pelas”ın hücumçusunu komandaya dəvət etmə qərarını şərh edib.
Fransa milli komandasının baş məşqçisi Didier Deşam Çempionatın 2026-cı il seçmə mərhələsi çərçivəsində Azərbaycan (10 oktyabr) və İslandiya (13 oktyabr) ilə oyunlar üçün milli komandanın heyəti ilə bağlı bəzi əsas qərarlarını açıqlayıb.
İdman.biz xəbər verir ki, Deşam “Kristal Pelas”ın hücumçusu Jean-Philippe Matetə ilk çağırışı şərh edib və onun oyun keyfiyyətlərini ayrıca vurğulayıb.
Mütəxəssisin sözlərinə görə, seçim hücumçunun xüsusiyyətləri və qol vurmaq bacarığı ilə bağlıdır:
“Bu onun profilidir... Onun olduğu hər komandada qol vurmaq qabiliyyəti olub. Biz onu uzun müddətdir izləyirik. Mateti dəvət etmək qərarı Azərbaycan və İslandiya ilə oyunlar öncəsi hücumda yaranan boşluqlarla bağlıdır,” - Deşam “RMC Sport”a açıqlamasında deyib.
Qeyd edək ki, Fransa milli komandasında “PSJ”nin oyunçuları Usman Dembele və Desere Duə yer almır - hər ikisi oktyabr oyunlarını zədələr səbəbindən buraxacaq.
Deşam ayrıca Eduardo Kamavinganın rolundan danışıb. “Real Madrid” oyunçusunun sol cinah müdafiəsinə keçirilməsi barədə sual verildikdə baş məşqçi bildirib:
“Əgər ondan bunu soruşsanız, yəqin ki, gülümsəməz. O, əsasən özünü yarımmüdafiəçi kimi görür, lakin universal oyun qabiliyyəti milli komanda üçün böyük üstünlükdür”, - Deşam vurğulayıb.
Əvvəlcə mütəxəssis Fransa komandasının DÇ-2026-nın seçmə mərhələsində rəqiblərini qiymətləndirərkən belə demişdi:
“Azərbaycana və İslandiyaya hörmətlə yanaşsaq da, qrupumuzdakı ən güclü rəqibimiz Ukrayna milli komandasıdır”.
Qeyd edək ki, Azərbaycan millisi DÇ-2026-nın seçmə mərhələsinin D qrupu çərçivəsində oktyabrın 10-da Parisdə Fransa millisi ilə qarşılaşacaq. Oyun Bakı vaxtı ilə saat 22:45-də başlayacaq. Cari seçmə mərhələdə Azərbaycan milli komandası səfərdə İslandiyaya 0:5 hesabı ilə uduzub və evdə Ukraynaya qarşı 1:1 hesablı heç-heçə edib.
Xatırladaq ki, Azərbaycan milli komandası Fransaya qarşı matça yeni baş məşqçi Ayxan Abbasovun rəhbərliyi altında çıxacaq. O, artıq rəsmi olaraq milli komandanın baş məşqçisi təyin edilib.
Teymur Tuşiyev
