“Bu, Azərbaycan şahmatının tarixi uğurudur. Bu vaxta qədər birdən-birə 4 qızıl medalımız olmamışdı”.
Bunu idman.biz-ə şahmat üzrə yeniyetmələrdən ibarət Azərbaycan millisinin baş məşqçisi Fərid Abbasov deyib.
O, yığmanın Rumıniyanın Mamaya şəhərində keçirilən Avropa çempionatında uğurlu çıxışını şərh edib. Abbasov bildirib ki, tarixi nəticə təsadüfi deyil, çünki şahmatçılar müxtəlif məşqlər keçərək bu yarışlara çox ciddi hazırlaşıblar: “Azərbaycanı yarışda 44 şahmatçı təmsil edib. Məhəmməd Kazımzadə, Mehriban Əhmədli (hər ikisi U-8), Əhməd Xaqan (U-12) və Rüstəm Rüstəmov (U-14) öz yaş kateqoriyalarında qızıl medal qazanıblar. Ən güclü qrup bizdədir. 18 yaşlılar - Ayan Allahverdiyeva və Xəzər Babazadə gümüş medala sahib olublar. Əminəm ki, onların tezliklə böyük şahmatda uğurlu gələcəyi olacaq. Çox perspektivli şahmatçımız var, Səadət Bəşirli bürünc medal qazanıb. Bu, onun çempionatda ikinci medalıdır. Bəşirli 2019-cu ildə 8 yaşında gümüş medal qazanıb. Azərbaycan tarixdə ilk dəfə olaraq komanda hesabında 47 ölkə arasında Avropa çempionatında birinci oldu. Hər kəsə köməyə görə təşəkkür edirik, bu, ümumi qələbədir”.
Qeyd edək ki, Azərbaycan şahmatçıları ilk dəfə yeniyetmələrin Avropa çempionatında 4 qızıl medal qazanmaqla rekord nəticəyə imza atıb.
Şəbnəm Rəhimova
İdman.biz
