“Netflix” boksda ağır çəkidə sabiq dünya çempionu Mayk Taysonun həyatına həsr olunan “TYSON” sənədli serialının treylerini təqdim edib.
İdman.Biz xəbər verir ki, dördhissəli layihənin premyerası oktyabrın 13-də baş tutacaq.
“TYSON” Mayk Taysonun həyat hekayəsindən bəhs edən dördhissəli sənədli serialdır. Layihədə onun Bruklində keçirdiyi uşaqlıq illərindən ağır çəkidə zirvəyə sürətli yüksəlişinə, asılılıq problemlərindən həbs həyatına, ictimai böhranlardan karyerasına az qala son qoyan məşhur qulaq dişləmə hadisəsinə qədər müxtəlif məqamlar əks olunacaq.
Hekayə Taysonun öz sözləri ilə təqdim edilir. Əvvəllər yayımlanmamış materiallar, həmçinin onun ailəsi, dostları və rəqibləri ilə bağlı nadir görüntülər keçmiş boksçuya yaxından nəzər salmağa imkan verəcək.
“Bu, əzəmətin, süqutun və hələ də öz irsinin nəticələri ilə üzləşən insanın yaxın və səmimi portretidir”, – deyə “Netflix”in YouTube kanalındakı təqdimat mətnində bildirilir.
