“Panatinaikos”un baş məşqçisi Ergin Ataman, ev sahibi komandanın 75:71 hesablı qələbəsi ilə başa çatan səfər oyunundan sonra “Makkabi” (Təl-Əviv) azarkeşlərinin davranışlarını kəskin tənqid edib.
İdman.Biz bildirir ki, Yunanıstan komandasının çalışdırıcısı oyun boyu təxminən 10.000 azarkeşin onu təhqir etdiyini deyir.
“Biz NBA-nı Avroliqa ilə müqayisə edirdik və Avroliqanın dünyanın ən yaxşı liqası olduğunu iddia edirdik. Amma bu gün baş verənlər basketbol deyil. İşinizi görmək üçün meydana çıxanda 10.000 nəfər sizi təhqir etdikdə, soyunma otağının qarşısında gözlədikdə və sonra 40 dəqiqə sizi təhqir etdikdə - bu, qəddarlıqdır. Və heç kim heç nə etmir. Bu, basketbol deyil. Mən NBA-da heç vaxt belə bir şey görməmişəm, ona görə də artıq Avroliqanı onunla müqayisə etməyəcəyəm. Bu, idman deyil.
Mən öz işimi görürəm və keçmişdə komandamı “Makkabi”yə qarşı pley-offa çıxardığım, seriyanı qazandığım, Dördlər Finalına çıxardığım və titul qazandığımla fəxr edirəm. Mən bura məhz bunun üçün gəlmişəm. Amma mən burada bütün oyun ərzində 10.000-15.000 insanın məni təhqir etməsinə dözmək üçün deyiləm və heç kim - nə hakimlər, nə komissarlar bununla bağlı heç nə etmir. Yaxşı, belə də davam edin”, - deyə Eurohoops Atamandan sitat gətirir.
