“Qarabağ”ın futbolçusu Bense Varkonyi Macarıstan millisindən dəvət almasını və karyerasında ilk dəfə əsas yığmaya çağırılmasını dəyərləndirib.
İdman.Biz xəbər verir ki, 24 yaşlı müdafiəçi bu barədə klubun mətbuat xidmətinə açıqlamasında danışıb.
“Milli komandaya çağırılacağımı öyrənəndə çox sevindim. Bu xəbəri böyük xoşbəxtlik və müsbət hisslərlə qarşıladım. Düşünürəm ki, hansı səviyyədə olmasından asılı olmayaraq, idmana başlayan hər bir insanın arzusu və məqsədi bir gün öz ölkəsi üçün mübarizə aparmaq, milli komandanın formasını geyinməkdir. Buna görə də bu dəvət məni həqiqətən çox sevindirdi.
Yayda “Qarabağ”a transfer olunmağım mənim üçün böyük addım idi. Xaricdə, yaxşı bir komandada özümü göstərmək istəyirdim. Yəqin ki, ilk dəfə milli komandaya dəvət almağımda bunun da rolu var. Kluba çox minnətdaram, çünki mənə hər məsələdə dəstək olurlar. Mənə etimad göstərilib və mən də bu etimadı doğrultmaq, ən yaxşı oyunumu nümayiş etdirmək üçün çalışıram.
Təbii ki, həm komanda, həm də fərdi səviyyədə qarşıma qoyduğum məqsədlər var. Onlara çatmaq üçün bundan sonra da əlimdən gələni etməyə davam edəcəyəm”.
Qeyd edək ki, Macarıstan millisi UEFA Millətlər Liqasında sentyabrın 25-də Ukraynanı, oktyabrın 2-də isə Gürcüstanı qəbul edəcək. Macarıstan yığması sentyabrın 28-də Şimali İrlandiyanın, oktyabrın 5-də isə Ukraynanın qonağı olacaq.
