“Komanda olaraq hər oyuna 3 xal qazanmaq düşüncəsi ilə çıxırıq. “Sumqayıt”la oyuna da qalibiyyət məqsədi ilə hazırlaşacağıq”.
Bunu “Karvan-Yevlax”ın futbolçusu Olavale Doyeni futbolinfo.az-a müsahibəsində deyib.
Həmin müsahibəni təqdim edirik.
– “Sabah”la oyun haqqında nə düşünürsünüz? Niyə 1:4 hesabı ilə məğlub oldunuz?
– Oyuna yaxşı planlarla çıxmışdıq, amma hər şey istədiyimiz kimi alınmadı. Rəqib çox güclü komandadır və oyun onların istədiyi ssenari üzrə getdi.
– Bu məğlubiyyətin komandaya necə təsir edəcəyini düşünürsünüz?
– Uduzduq və təbii ki, bundan məmnun deyilik. Amma çempionat marafon kimidir. Biz yenidən toparlanacağıq, müsbət cəhətləri inkişaf etdirəcəyik və üzərində işləməli olduğumuz məqamları düzəldəcəyik.
– Vəziyyəti dəyişə biləcəyinizə və bəxtin yenidən üzünüzə güləcəyinə inanırsınızmı?
– Əlbəttə, bəli. İnamı qorumaq çox vacibdir. Biz heç vaxt mübarizədən əl çəkməyən bir komandayıq. Hər şeyin yaxşılığa doğru dəyişəcəyinə ümidimiz var.
– Növbəti oyun evdə “Sumqayıt”a qarşı olacaq. 3 xal qazana biləcəksinizmi?
– Komanda olaraq hər oyuna 3 xal qazanmaq düşüncəsi ilə çıxırıq. “Sumqayıt”la oyuna da qalibiyyət məqsədi ilə hazırlaşacağıq.
– Hazırda turnir cədvəlinin təhlükəli zonasında yer alırsınız. Sizcə, son pillədən çıxa biləcəksinizmi?
– Dediyim kimi, çempionat marafon kimidir. Biz yolumuza davam edəcəyik və heç vaxt dayanmayacağıq. Meydanda sona qədər mübarizə aparacağıq, çünki daha yaxşı mövqedə olmağa gücümüzün çatdığını bilirik.
