“Dünya çempionatının başlamasını səbirsizlik ilə gözləyirəm. Əminəm ki, bizim idmançılarımız orda yüksək səviyyədə çıxış edəcəklər, üçrəngli bayrağımızı dalğalandıracaqlar”.
Bunu İdman.biz saytına 2015-ci il Las Veqasda keçirilən dünya çempionatının qalibi, Olimpiya oyunlarının bürünc, Dünya Kubokunun qızıl medalçısı və Avropa çempionatının mükafatçısı Rəsul Çunayev deyib.
Sentyabrın 16-da Serbiyanın paytaxtı Belqradda dünya çempionatı start götürəcək. Azərbaycan mundialda 26 idmançı ilə təmsil olunacaq. Yığmamızın sabiq güləşçisi bildirib ki, yarış milli üçün uğurlu alınacaq: “Düşünürəm ki, Rusiya və Belarusdan olan idmançıların mundialda çıxış etməsi bizim güləşçilərin çıxışına heç bir təsir etməyəcək. İdmançılarımız hansı ölkənin olmasından asılı olmayaraq, müxtəlif yarışlarda daima öz sözlərini deyiblər. Əminəm ki, bu mundialda da onlar tarix yazacaqlar. Hər biri qızıl medal və lisenziya götürməyə layiqdirlər. Komandanın hər birinə inanıram və uğurlar arzulayıram”.
Qeyd edək ki, karyerası ərzində 37 beynəlxalq yarışa qatılan Rəsul Çunayev onların 13-də qızıl, 6-da gümüş, 12-də isə bürünc medal qazanıb. O, ötən il idmançı karyerasını başa vurub.
Emin Ağa
İdman.biz
