“Milan”ın sahibi Cerri Kardinale “Real Madrid”in hücumçusu Endrikin transferini klubun əsas hədəflərindən biri hesab edir.
İdman.Biz xəbər verir ki, Kardinale uzun müddətdir braziliyalı futbolçunun oyununu bəyənir və onun qış transfer pəncərəsində komandaya qoşulmasını istəyir.
Klub rəhbəri bu transferin həyata keçirilməsində tezliklə futbol departamentinin rəhbəri vəzifəsinə gəlməsi gözlənilən Markus Kröşenin köməyinə ümid edir.
“Milan” ötən yay da Endriki heyətinə qatmağa çalışıb. Lakin “Real Madrid”in baş məşqçisi Joze Mourinyo hücumçunun ayrılmasına icazə verməyib.
İtaliya təmsilçisinin bu dəfə də ciddi rəqabətlə üzləşəcəyi gözlənilir. “Roma”, “Aston Villa” və “Arsenal” da 20 yaşlı futbolçunun xidmətində maraqlıdır.
Endrik “Roma” ilə görüşdə meydana sonradan daxil olaraq yaxşı təsir bağışlasa da, hələ Mourinyonun etimadını tam qazana bilməyib. O, “El-Klasiko”da ehtiyatda qalıb, “RB Leypsiq” və “Rasinq Santander”lə qarşılaşmalarda isə az oyun vaxtı əldə edib.
Futbolçunun vəziyyəti dəyişməsə, qış transfer pəncərəsində komandadan ayrılması real varianta çevrilə bilər.
“Milan” həmçinin Qonsalu Ramos üçün etibarlı əvəzedici axtarır. Klub rekord məbləğə transfer etdiyi hücumçunun qeyri-sabit çıxışından narazıdır. Bununla yanaşı, gənc hücumçu Françesko Kamardanın icarəyə verilməsi variantı da nəzərdən keçirilir.
