Türkiyənin “Amedspor” futbol komandası Super Liqanın 10-cu turunda “Eyüpspor” üzərində böyükhesablı qələbə qazanıb.
İdman.Biz xəbər verir ki, Diyarbəkir təmsilçisi doğma meydanda rəqibini 5:1 hesabı ilə məğlub edib.
Meydan sahibləri 13-cü dəqiqədə Ermal Krasniçinin qolu ilə hesabı açıblar. 35-ci dəqiqədə Gift Orban üstünlüyü artırıb. İlk hissənin sonlarında, 42-ci dəqiqədə Samuel Balle fərqlənərək hesabı 3:0-a çatdırıb.
İkinci hissədə də üstün oyun nümayiş etdirən “Amedspor” 51-ci dəqiqədə Ballenin növbəti qolu ilə fərqi dördə yüksəldib.
Qonaqlar 73-cü dəqiqədə Əhməd Abdullahi ilə qollardan birinin əvəzini çıxıblar. Lakin 83-cü dəqiqədə penaltini dəqiq yerinə yetirən Balle het-trikini rəsmiləşdirib və yekun hesabı müəyyənləşdirib.
İsveçrəli futbolçu üç qol vurmasına baxmayaraq, qarşılaşmanı meydanda başa çatdıra bilməyib. O, 90+1-ci dəqiqədə qırmızı vərəqə alaraq meydandan qovulub.
Bununla da Balle növbəti turda “Qalatasaray”a qarşı keçiriləcək səfər görüşünü buraxmalı olacaq.
Bu qələbədən sonra “Amedspor” xalını 23-ə çatdıraraq lider “Qalatasaray”ı izləməyə davam edib. Komanda doğma meydanda keçirdiyi altı oyunun hamısında qalib gəlib və məğlubiyyətsiz seriyasını səkkiz qarşılaşmaya yüksəldib.
“Eyüpspor” isə üç xalla qalıb.
Qeyd edək ki, növbəti turda “Amedspor” səfərdə “Qalatasaray”la üz-üzə gələcək. “Eyüpspor” isə “Kocaelispor”u qəbul edəcək.
