“Sabah”ın UEFA Çempionlar Liqasındakı növbəti rəqibi “Vikinq” Norveç Elitseriyasında mühüm qarşılaşmada məğlubiyyətə uğrayıb. Stavanger təmsilçisi çempionluq uğrunda əsas rəqibi “Budo-Qlimt”ə səfərdə 2:3 hesabı ilə uduzub.
İdman.Biz xəbər verir ki, Norveç çempionatının 25-ci turuna təsadüf edən görüş Budo şəhərindəki “Aspmyra” stadionunda keçirilib.
Meydan sahibləri oyuna sürətli başlayıblar. Artıq dördüncü dəqiqədə “Vikinq”in müdafiəçisi Henrik Falçener topu öz qapısına göndərib. 15-ci dəqiqədə Andreas Helmersen fərqi iki topa çatdırıb.
Lakin qonaqlar təslim olmayıblar. 32-ci dəqiqədə Kristoffer Haugen Zlatko Tripiçin ötürməsindən sonra fərqi azaldıb. Yeddi dəqiqə sonra isə Haugen bu dəfə məhsuldar ötürmə ilə yadda qalıb. Erik Botheym onun ötürməsini qola çevirərək hesabı bərabərləşdirib - 2:2.
“Vikinq”in sevinci uzun çəkməyib. 43-cü dəqiqədə Ulrik Saltnesin ötürməsindən yararlanan Yens Petter Hauge “Budo-Qlimt”i yenidən hesabda önə çıxarıb.
Beləliklə, qarşılaşmanın ilk hissəsində beş qol vurulub və fasiləyə meydan sahibləri 3:2 hesablı üstünlüklə yollanıblar. İkinci hissədə hesab dəyişməyib.
Bu nəticə Norveç çempionatında liderlik mübarizəsini daha da gərginləşdirib. Qələbə qazanan “Budo-Qlimt” xallarının sayını 59-a çatdıraraq “Vikinq”ə çatıb. Hər iki komanda 25 oyundan sonra eyni xala malik olsa da, Stavanger təmsilçisi top fərqinə görə birinci, “Budo-Qlimt” isə ikinci pillədə qərarlaşıb.
Maraqlıdır ki, “Vikinq”lə qarşılaşmağa hazırlaşan “Sabah” da Azərbaycan Premyer Liqasının son turunda məğlubiyyətlə üzləşib. Bakı təmsilçisi səfərdə “Turan Tovuz”a 2:3 hesabı ilə uduzub.
Qeyd edək ki, “Vikinq” və “Sabah” UEFA Çempionlar Liqasının liqa mərhələsinin dördüncü turunda üz-üzə gələcəklər. Qarşılaşma noyabrın 4-də Norveçdə keçiriləcək.
