Argentina futbol millisinin baş məşqçisi Lionel Skaloni yığmadakı fəaliyyətini davam etdirməyə yaxındır.
İdman.Biz xəbər verir ki, Argentina Futbol Assosiasiyası (AFA) 48 yaşlı mütəxəssisə yeni müqavilə təklif edib. Sözləşmənin 2028-ci ildə keçiriləcək Amerika Kubokuna qədər qüvvədə olması nəzərdə tutulur. Tərəflərin razılığı ilə müqavilənin 2030-cu il dünya çempionatına qədər uzadılması da mümkün olacaq.
Skaloni 2018-ci ildən Argentina millisinə rəhbərlik edir. Onun başçılığı altında komanda 2021 və 2024-cü illərdə Amerika Kubokunu, 2022-ci ildə “Finalissima”nı və dünya çempionatını qazanıb.
Hazırda AFA-nın rəsmi məlumatlarında da Skaloni Argentina millisinin baş məşqçisi kimi göstərilir və komanda onun rəhbərliyi altında sentyabr-oktyabr aylarındakı yoldaşlıq görüşlərinə hazırlaşır.
