İspaniya La Liqasında yeddinci turun oyunları keçirilir.
İdman.Biz xəbər verir ki, tur “Espanyol” və “Elçe” arasındakı qarşılaşma ilə başlayıb. Görüşün əvvəlində Federiko Redondonun meydandan qovulmasından sonra azlıqda qalan qonaqlar 3:1 hesabı ilə qalib gəlməyi bacarıblar. Fer Ninyo ilk hissədə dubl edib, görüşün sonlarında isə German Valera “Elçe”nin üçüncü qolunu vurub. Kataloniya təmsilçisinin yeganə qolu Viktor Çustun avtoqolundan sonra qeydə alınıb.
Turun əsas oyunları öncəsi turnir cədvəlinə keçirdiyi 6 görüşün hamısında qalib gələn və 18 xal toplayan “Barselona” inamla başçılıq edir. “Real” və “Betis”in hərəyə 15, “Atletiko” və “Sevilya”nın isə 13 xalı var.
“Sevilya” – “Barselona”
“Barselona” Əndəlüs səfərinə 100 faizlik nəticə ilə yollanır – 6 oyunda 6 qələbə. Hans-Diter Flikin komandası təkcə 18 xalla liderlik etmir, həm də yüksək məhsuldarlıq nümayiş etdirir: 28 qol. Kataloniyalılar ötən turda “Rasinq”i 7:2 hesabı ilə darmadağın edib. Həmin görüşdə Rafinya het-trik edib.
“Sevilya” da çempionata əla başlayıb. Luis Qarsiya Plasanın komandası 13 xal toplayıb və 5-ci pillədə qərarlaşıb. Əvvəlki görüşdə Əndəlüs təmsilçisi səfərdə “Deportivo”nu Migel Sierranın qolu sayəsində 1:0 hesabı ilə məğlub edib.
“Barselona”nın heyəti ilə bağlı əsas xəbər Xoan Qarsiya ilə əlaqədardır. Qapıçı sağ dizində narahatlıq hiss edir və “Sevilya” ilə matçı buraxacaq. Flik onun istirahət edəcəyini təsdiqləyib. Meydan sahiblərinin heyətində Lukas Stassin zədə səbəbindən oynamayacaq, Ruben Varqasın yoxluğu da davam edir. Bununla belə, Aruna Sanqante heyətə qayıdıb.
Kataloniya təmsilçisi üçün matçın əlavə əhəmiyyəti də var: “Barselona” ötən mövsüm “Ramon Sançes Pisxuan” stadionunda 1:4 hesabı ilə ağır məğlubiyyətə uğrayıb.
“Atletiko” – “Real”
Madrid derbisi turun əsas hadisələrindən biri olacaq. “Real” 6 oyundan sonra 15 xalla 2-ci pillədədir. “Atletiko” isə cəmi 2 xal geridədir və 4-cü yerdə qərarlaşıb.
Joze Mourinyonun komandası ötən turda səfərdə “Elçe”ni böyük çətinliklə 3:2 hesabı ilə məğlub edib. Madrid təmsilçisi həlledici qolu görüşün sonlarında vurub. Komandanın çempionatda yeganə məğlubiyyəti “Betis”ə qarşı olub – 0:1.
“Atletiko” isə uğursuz dönəmdən sonra nəzərəçarpacaq dərəcədə irəliləyiş edib. Dieqo Simeonenin komandası La Liqada son 2 matçını ümumilikdə 7:0 hesabı ilə qazanıb – “Real Sosyedad”ı 3:0, “Osasuna”nı isə 4:0 hesabı ilə məğlub edib. Son qarşılaşmada Conatan Devid, Li Kan İn, Robin Le Norman və Aleks Baena fərqləniblər.
Derbi öncəsi “Real”da Ferlan Mendi, Eder Militao və Rodriqo fərdi proqram üzrə məşqlərini davam etdirirlər. “Atletiko” üçün isə Xulian Alvaresin ümumi qrupda məşqlərə qayıtması yaxşı xəbər olub. Bununla yanaşı, İspaniya mətbuatının məlumatına görə, Pablo Barrios və Aleksander Syorlot qarşılaşmanı buraxacaqlar.
Qeyd edək ki, “Real” və “Atletiko” bütün turnirlərdə indiyədək 305 dəfə qarşılaşıblar. Ümumi statistikada üstünlük “kral klubu”nun tərəfindədir: 156 qələbəyə qarşı “Atletiko”nun 76 qələbəsi var, daha 73 görüş heç-heçə başa çatıb. Ötən mövsüm komandalar La Liqada öz meydanlarında qələbə qazanıblar: “Atletiko” prinsipial rəqibini “Metropolitano”da 5:2 hesabı ilə darmadağın edib, ikinci dövrədə isə “Real” 3:2 hesabı ilə revanş alıb. Madrid derbiləri tarixinin ən məhsuldar futbolçusu isə 22 qol vuran Kriştiano Ronaldodur.
“Deportivo” – “Betis”
Maraqlı qarşılaşmalardan biri də “Riasor” stadionunda keçiriləcək. Elitaya qayıdan “Deportivo” mövsümə kifayət qədər inamlı başlayıb və 6 oyundan sonra 9 xalla 7-ci pillədə qərarlaşıb.
Antonio İdalqonun komandası ötən turda çempionatda ilk məğlubiyyətini alıb – “Sevilya”ya 0:1 hesabı ilə uduzub. Qalisiya təmsilçisi bundan əvvəl mövsümün ilk 5 oyununda məğlub olmayıb.
“Betis” isə turnir cədvəlində xeyli yuxarıda qərarlaşıb. Manuel Pelleqrininin komandası 15 xalla 3-cü pillədədir və yalnız əlavə göstəricilərə görə “Real”dan geri qalır. Sevilya təmsilçisi La Liqada son 3 matçını qələbə ilə başa vurub: “Real” üzərində 1:0, “Vilyarreal” üzərində 2:1 və “Xetafe” üzərində 1:0. Son görüşdə qələbə qolunu Ez Abde vurub.
“Deportivo”da qarşılaşma öncəsi müəyyən heyət problemləri var. Antonio İdalqo bildirib ki, bir neçə futbolçu virus xəstəliyi keçirib və onların vəziyyəti qiymətləndirilir. Bundan əlavə, Pyer-Emerik Obameyanq və Lorenso Amatuççi böyük oyun yükü səbəbindən cümə günü fərdi proqram üzrə məşq ediblər.
Yeddinci turun Bakı vaxtı ilə oyun cədvəli
18 sentyabr
23:00 “Espanyol” – “Elçe” – 1:3
19 sentyabr
16:00 “Osasuna” – “Rayo Valyekano”
18:15 “Atletik” – “Alaves”
20:30 “Selta” – “Rasinq”
23:00 “Sevilya” – “Barselona”
20 sentyabr
16:00 “Xetafe” – “Malaqa”
18:15 “Atletiko” – “Real”
20:30 “Deportivo” – “Betis”
20:30 “Vilyarreal” – “Levante”
23:00 “Valensiya” – “Real Sosyedad”
Turnir cədvəli
“Barselona” – 18
“Real” – 15
“Betis” – 15
“Atletiko” – 13
“Sevilya” – 13
“Alaves” – 10
“Deportivo” – 9
“Atletik” – 7
“Espanyol” – 7
“Rasinq” – 7
“Rayo Valyekano” – 7
“Real Sosyedad” – 7
“Osasuna” – 7
“Vilyarreal” – 5
“Levante” – 5
“Xetafe” – 5
“Elçe” – 5
“Selta” – 4
“Valensiya” – 4
“Malaqa” – 3.
