Türkiyənin “Beşiktaş” klubu bu transfer pəncərəsində “Real Madrid”in müdafiəçisi David Alaba ilə müqavilə imzalamaqda maraqlıdır.
İdman.Biz bu barədə AS-a istinadən məlumat verir.
“Beşiktaş”ın baş məşqçisi Sergen Yalçın bildirib ki, klub qış transfer pəncərəsində iki və ya üç gücləndirmə gözləyir və Alaba onların əldə etmək istədiyi oyunçulardan biridir.
Transferin əsas problemi Alabanın maaşıdır. Müdafiəçiyə mövsümün qalan aylarında “Real Madrid” əlavə 7 milyon avro borcludur. “Beşiktaş” ona bu məbləği ödəmək istəmir və “Real Madrid” müqaviləni tamamlamaq üçün maaşının bir hissəsini ödəməyə davam etməlidir. Bundan əlavə, Alaba əvvəllər potensial alıcının əzəli rəqibi “Qalatasaray”ın fanatı olduğunu bildirmişdi.
Bu mövsüm oyunçu “Real Madrid” üçün bütün yarışlarda beş oyun keçirib, lakin qol vura bilməyib. Alabanın Madrid klubu ilə hazırkı müqaviləsi 30 iyun 2026-cı ilə qədərdir. Transfermarkt portalına görə, oyunçunun transfer dəyəri 4 milyon avrodur.
