Romelu Lukaku Belçika millisində karyerasını başa vurdu

16 Noyabr 2026 14:36
32
Romelu Lukaku Belçika millisində karyerasını başa vurdu

Belçika millisinin və Türkiyənin “Fənərbağça” klubunun hücumçusu Romelu Lukaku yığmadakı karyerasını başa vurduğunu açıqlayıb.

İdman.Biz xəbər verir ki, 33 yaşlı futbolçu bu barədə sosial şəbəkə hesabında paylaşım edib.

Lukaku milli komandada keçirdiyi 16 ili möhtəşəm təcrübə kimi xarakterizə edib və komanda yoldaşlarına, məşqçilərə, azarkeşlərə təşəkkürünü bildirib.

“Bu 16 il ərzində milli komanda üçün əlimdən gələni etdim. Mümkün olan bütün hissləri yaşadım. Hər zaman minnətdar olacağım möhtəşəm komanda yoldaşları ilə birlikdə oynadım. Məni daim daha yaxşı olmağa sövq edən və komandaya kömək edə biləcəyimə inanan bütün məşqçilərə təşəkkür edirəm. Möhtəşəm yol keçdim və hər anından zövq aldım”, - deyə hücumçu yazıb.

O, Belçikanı dörd dünya çempionatında və üç Avropa çempionatında təmsil etməklə qürur duyduğunu vurğulayıb.

Qeyd edək ki, Romelu Lukaku Belçika millisində 2010-cu ildən çıxış edirdi. O, 135 oyunda 94 qol vuraraq yığmanın tarixində ən məhsuldar futbolçu adına sahibdir. Bu göstərici ilə Kevin De Bruyneni 53 qol qabaqlayır.

Xatırladaq ki, Romelu Lukaku 2026-cı ilin avqustunda İtaliyanın "Napoli" klubundan Türkiyənin "Fənərbağça" komandasına transfer olunub. Belçikalı hücumçu İstanbul təmsilçisi ilə 2027-ci ilin iyununa qədər müqavilə imzalayıb.

İdman.Biz