“Milan”ın baş məşqçisi Massimiliano Alleqri İtaliya Superkubokunun yarımfinalında “Napoli” ilə oyunda etdiyi davranışa görə intizam komissiyası tərəfindən 10 min avro cərimələnib.
İdman.Biz-in “Football Italia”ya istinadən verdiyi məlumata görə, matçda A Seriyasının hazırkı çempionu 2:0 hesabı ilə qalib gəlib.
“Napoli” ilə oyun zamanı Massimiliano Alleqri “Napoli”nin idman koordinatoru Qabriele Orialini dəfələrlə ədəbsiz ifadələrlə təhqir edib. Məşqçinin təhqirləri televiziyada canlı yayımlanıb. Oyundan sonra “Napoli” “qırmızı-qaralar”ın məşqçisinin hərəkətlərini pisləyən bəyanat yayıb.
Finalda Antonio Kontenin komandası “İnter”i penaltilərlə məğlub etmiş “Bolonya” ilə qarşılaşacaq. Oyun dekabrın 22-də keçiriləcək.
