Qadın voleybolçulardan ibarət Azərbaycan millisi iyunun 13-14-də 2025-ci il mövsümündə Avropa Qızıl Liqasında son oyunlarını keçirəcək.
İdman.biz xəbər verir ki, yarış Xorvatiyanın Zadar şəhərində baş tutacaq.
Faiq Qarayevin yetirmələri iyunun 13-də meydança sahibləri, ertəsi gün isə Rumıniya ilə qarşılaşacaqlar.
Komandamızın xorvatlarla matçlarda müsbət statistikası var. Rəqiblər rəsmi yarışlarda altı dəfə üz-üzə gəliblər və beş oyunda Azərbaycan komandası qələbə qazanıb. Sonuncu dəfə bu, ötən ilin Avropa Qızıl Liqasında baş verib - 3:0.
Rumıniya ilə qarşılaşmaların statistikasına gəlincə, altı rəsmi matçdan sonra 3:3 hesablı bərabərlik var. Düzdür, ötən ilki Avropa Qızıl Liqası da daxil olmaqla, son üç görüşdə rəqiblər qalib gəlib.
İdman.biz
