“Çox qürurverici bir andır”.
İdman.biz xəbər verir ki, bunu cüdo üzrə kişilərdən ibarət Azərbaycan millisinin məşqçisi Rixard Trautman deyib.
O, Paris-2024 Yay Olimpiya Oyunlarında tarix yazan cüdoçularımızın Heydər Əliyev Beynəlxalq Aeroportunda qarşılanma mərasimində bildirib ki, tək çempionlarımız yox, bütün komandaları gözəl iş görüb: “Biz bu nəticə ilə fəxr edirik. Qısa müddətdən sonra yenidən növbəti yarışlara, xüsusilə də Olimpiya Oyunlarına hazırlaşmağa başlayacağıq. Ümid edirik ki, növbəti Olimpiadada tək kişilər arasında deyil, qadınlar arasında da medal qazanaq”.
Qeyd edək ki, Azərbaycan millisi Paris-2024-də 2 qızıl medal qazanmaqla tarixinin ən yaxşı güstəricisinə imza atıb. Cüdoçularımızdan Hidayət Heydərov (73 kq) və Zelim Kotsoyev (100 kq) bütün rəqiblərinə qalib gəlməklə Olimpiya çempionu tituluna yiyələniblər.
Banuçiçək Hüseynli
İdman.biz
