Seneqalın paytaxtı Dakarda keçirilən Yeniyetmələrin IV Yay Olimpiya Oyunlarının bağlanış mərasimi təşkil olunub.
İdman.Biz xəbər verir ki, Diamniadiodakı Atletlər Kəndində yerləşən “Village Plaza”da keçirilən tədbir Oyunların açılış mərasimindən ən yaddaqalan anları əks etdirən videoçarxın nümayişi ilə başlayıb.
Sonra iştirakçı ölkələrin paradı olub. Olimpiya ənənəsinə uyğun olaraq, paradın önündə Yunanıstan komandası yer alıb. Daha sonra digər ölkələrin idmançıları ilə birgə Azərbaycan komandası da paraddan keçib. Gender bərabərliyinə görə üçrəngli bayrağımızı Oyunların gümüş mükafatçıları - boksçu Gülər Hüseynova (51 kq) və taekvondoçu Adil Kazımlı (-73 kq) daşıyıblar.
Xatırladaq ki, oktyabrın 31-də Dakardakı Abdulaye Vade stadionunda keçirilən açılış mərasimində Azərbaycan bayrağını üzgüçülərimiz - III MDB Oyunlarının qalibi, VI İslam Həmrəyliyi Oyunlarının bürünc mükafatçısı Süleyman İsmayılzadə və VI İslam Həmrəyliyi Oyunlarının bürünc medalçısı Məryəm Cavadova daşımışdılar.
Tədbir çərçivəsində Oyunların təşkilində iştirak edən könüllülərə minnətdarlıq ifadə olunub.
Ardınca Dakar-2026 Yeniyetmələrin IV Yay Olimpiya Oyunlarının Təşkilat Komitəsinin prezidenti Mamadou Diaqna Ndiaye çıxış edib. O, yarışların təşkilində əməyi olan hər kəsə təşəkkürünü bildirib, Seneqala gələn qonaqların bu ölkədən xoş təəssüratlarla, yeni dostluq əlaqələri və unudulmaz xatirələrlə ayrılacaqlarına ümidvar olduğunu söyləyib. Təşkilat Komitəsinin rəhbəri Seneqal xalqının nümayəndə heyətlərini böyük hörmət və səmimiyyətlə qarşıladığını vurğulayaraq iştirakçıları gələcəkdə yenidən ölkəsində görmək arzusunu ifadə edib.
Sonra Beynəlxalq Olimpiya Komitəsinin (BOK) prezidenti Kirsti Koventri çıxış edib. O, ilk növbədə Təşkilat Komitəsinin prezidenti Mamadou Diaqna Ndiayeyə və onun rəhbərlik etdiyi komandaya son səkkiz il ərzində Oyunların təşkili istiqamətində göstərdikləri gərgin əməyə görə təşəkkür edib. BOK prezidenti könüllülərin və təşkilatçı heyətin xidmətlərini də xüsusi qeyd edərək onların bu mötəbər idman tədbirinin yüksək səviyyədə keçirilməsinə mühüm töhfə verdiklərini bildirib.
Kirsti Koventri idmançılara müraciətində Dakar-2026-nın Olimpiya tarixində xüsusi əhəmiyyət daşıdığını vurğulayıb. O qeyd edib ki, Afrika qitəsində ilk dəfə təşkil olunan Yeniyetmələrin Yay Olimpiya Oyunlarında iştirak edən gənclər tarixi hadisənin bir parçasına çevriliblər. BOK prezidenti son 14 gün ərzində idmançıların qazandıqları təcrübənin, yaşadıqları sevincin və qurduqları dostluqların gələcək həyatlarında mühüm rol oynayacağına əminliyini ifadə edib.
O, gəncləri Oyunlarda qazandıqları təcrübədən ilhamlanaraq dünyanı dəyişməyə, daha yaxşı gələcəyin qurulmasına töhfə verməyə çağırıb. Kirsti Koventri idmançıların yalnız öz ölkələri üçün deyil, ailələri və təmsil etdikləri icmalar üçün də nümunə və ilham mənbəyi olduqlarını diqqətə çatdırıb.
BOK prezidenti çıxışının sonunda Seneqal xalqına və Dakar sakinlərinə göstərdikləri qonaqpərvərliyə görə minnətdarlığını bildirib.
Çıxışlardan sonra Beynəlxalq Olimpiya Komitəsinin rəsmi himni səsləndirilib və Olimpiya bayrağı endirilib.
Qeyd edək ki, Dakar-2026-da 8 idman növü üzrə 13 idmançı ilə təmsil olunan Azərbaycan komandası Oyunları 3 qızıl və 3 gümüş medalla başa vurub. Qızıl medalları komandamıza cüdoçu İbrahim Talıbov (-55 kq), eləcə də çimərlik güləşçiləri Tunar Quliyev (70 kq) və Elgün Kərimli (90 kq) qazanıblar. Digər çimərlik güləşçimiz Nihad Süleymanlı (80 kq), taekvondoçumuz Adil Kazımlı (-73 kq) və boksçumuz Gülər Hüseynova (51 kq) isə Oyunları gümüş medalla başa vurublar. Komandamız bu nəticə ilə ümumi medal sıralamasında 13-cü yeri tutub. Çin Xalq Respublikasının yığması 18 qızıl, 8 gümüş və 7 bürünc medalla birinci olub. Yaponiya komandası 11 qızıl, 8 gümüş və 9 bürünc medalla ikinci, Rusiya yığması isə 8 qızıl, 4 gümüş və 2 bürünc medalla üçüncü yeri tutub.
12:50
Bu gün Seneqalın paytaxtı Dakarda keçirilən Yeniyetmələrin dördüncü Yay Olimpiya Oyunlarının bağlanış mərasimi təşkil olunacaq.
İdman.Biz xəbər verir ki, Diamniadiodakı Atletlər Kəndində yerləşən “Village Plaza”da baş tutacaq mərasim Bakı vaxtı ilə saat 22:00-da başlayacaq.
Mərasimdə gənc idmançılar Olimpiya məşəlinin söndürülməsindən əvvəl sonuncu dəfə bir araya gələcəklər.
Bağlanış mərasimində Azərbaycanın üçrəngli bayrağını gender bərabərliyinə görə Oyunların gümüş mükafatçıları - boksçu Gülər Hüseynova (51 kq) və taekvondoçu Adil Kazımlı (73 kq) daşıyacaqlar.
Xatırladaq ki, oktyabrın 31-də Dakardakı Abdulaye Vade stadionunda keçirilən açılış mərasimində Azərbaycan bayrağını üzgüçülərimiz - Üçüncü MDB Oyunlarının qalibi, Altıncı İslam Həmrəyliyi Oyunlarının bürünc mükafatçısı Süleyman İsmayılzadə və Altıncı İslam Həmrəyliyi Oyunlarının bürünc medalçısı Məryəm Cavadova daşımışdılar.
Qeyd edək ki, hazırda Azərbaycan komandasının aktivində üç qızıl və üç gümüş medal var. Qızıl medalları cüdoçu İbrahim Talıbov (55 kq), eləcə də çimərlik güləşçiləri Tunar Quliyev (70 kq) və Elgün Kərimli (90 kq) qazanıblar. Digər çimərlik güləşçimiz Nihad Süleymanlı (80 kq), taekvondoçumuz Adil Kazımlı (73 kq) və boksçumuz Gülər Hüseynova (51 kq) isə Oyunları gümüş medalla başa vurublar. Komandamız hazırda bu nəticə ilə ümumi medal sıralamasındda 11-ci pillədə qərarlaşır.
Xatırladaq ki, bu gün Dakarda keçirilən Yeniyetmələrin Olimpiya Oyunlarında Azərbaycanın sonuncu təmsilçisi - qılıncoynadan Abbas Hüseynov mübarizəyə qoşulacaq. O, şəxsi yarışda ilk görüşünü Sinqapur təmsilçisi Eşton Auya qarşı keçirəcək. Görüşlər Bakı vaxtı ilə saat 13:00-da başlayacaq.
