Futzal üzrə dünya çempionatı-2028-in əsas mərhələsində keçiriləcək Azərbaycan - Çexiya oyununu İtaliyadan olan hakimlər briqadası idarə edəcək.
İdman.Biz xəbər verir ki, 12-ci qrupun qarşılaşmasının baş hakimi Kiara Perona olacaq.
Ona həmyerliləri Martina Pikkolo və Simone Zanfino kömək edəcəklər. Matçın timekeeper-i İmran Məhərrəmov, hakim-inspektoru niderlandlı Viktor van Helvoirt, UEFA nümayəndəsi isə belaruslu Andrey Medvedev olacaq.
Qeyd edək ki, Azərbaycan - Çexiya görüşü noyabrın 5-də, saat 16:00-da Lənkəran Olimpiya İdman Kompleksində keçiriləcək.
Xatırladaq ki, Azərbaycan millisi Çexiya və Latviya ilə birlikdə 12-ci qrupda mübarizə aparır. Seçmə mərhələsinin ilk oyununda səfərdə Çexiyaya 1:2 hesabı ilə məğlub olan yığmamız hələ xal qazana bilməyib. Çexiya dörd xalla qrup lideridir, Latviyanın isə birinci xalı var.
