"Real Madrid"in hücumçusu Vinisius Junior son bir ildə tez-tez transfer şayiələrinin mərkəzində olub, xüsusilə də Səudiyyə Ərəbistanı klublarının maraq dairəsinə düşüb. Lakin az adam onun Avropa daxilində klub dəyişəcəyi ehtimalını ciddi şəkildə nəzərdən keçirib.
İdman.biz xəbər verir ki, 25 yaşlı futbolçu uzun müddət davam edən danışıqlara baxmayaraq, hələ də "Real" ilə yeni müqavilə imzalamayıb. Bildirilir ki, tərəflər artıq şərtlərdə ilkin razılığa gəlmişdi, lakin son zamanlar Vinisius komanda yoldaşı Kilian Mbappe ilə eyni və ya daha yüksək maaş tələb edib. Səudiyyə Ərəbistanı klubları onun əsas potensial istiqaməti hesab olunsa da, son vaxtlar bu maraq səngiyib.
"Indykaila"nın məlumatına görə, Vinisius Premyer Liqanın nəhəng klubu “Mançester Siti” ilə gizli danışıqlar aparıb. Bildirilir ki, “Siti” onun komanda yoldaşı Rodriqo üçün də transfer imkanı axtarır, lakin Vinisiusun özü də "Santiago Bernabeu"nu tərk etməyə açıqdır. O, “Siti”nin Premyer Liqada maliyyə pozuntuları ilə bağlı məhkəmə işi ilə bağlı narahatlıq keçirsə də, mövcud variantlarını dəyərləndirir.
Bu transferin ya bu yay, ya da gələn il baş tuta biləcəyi qeyd olunur. “Siti”nin rəqibləri – “Liverpul”, “Mançester Yunayted”, “Arsenal” və “Çelsi” də Vinisiusu diqqətlə izləyir. Futbolçunun Premyer Liqaya keçməkdə ciddi maraqlı olduğu vurğulanır.
Hazırda “Real”ın Vinisiusu Avropadakı bir kluba satmağa razı olub-olmayacağı bəlli deyil.Maraqlıdır ki, bu halda “Real”ın nəzərində əvəz kimi “Mançester Siti”dən bir ulduz futbolçu var. Vinisiusun Mbappe ilə uyğunluğu ilə bağlı suallar yaranıb və “Real” artıq açıq şəkildə bildirib ki, komanda fransız ulduzun ətrafında qurulacaq. Səudiyyə Ərəbistanına transfer yüz milyonlarla avroya başa gələ bilərdi və bu, onu fərqli qitəyə aparardı. Lakin onu Çempionlar Liqasındakı birbaşa rəqibə daha aşağı məbləğə satmaq – tamam fərqli məsələdir.
Qeyd edək ki, "Transfermarkt"a görə, Vinisius Juniorun transfer dəyəri 170 milyon avro təşkil edir.
İdman.biz
