Bu gün milli komandaların oyunları ilə bağlı fasilədən sonra Türkiyə çempionatı bərpa olunur.
Yeddinci tur ərəfəsində turnir cədvəlində vəziyyət olduqca sıxdır: lider “Amedspor”la doqquzuncu pillədə qərarlaşan “Rizespor”u cəmi üç xal ayırır.
Altı turdan sonra “Amedspor” və “Qalatasaray”ın 13, “Beşiktaş” və “Kocaelispor”un 12, “Alanyaspor”un isə 11 xalı var. “Fənərbağça”, “Trabzonspor”, “Kasımpaşa” və “Rizespor” 10 xal toplayıb.
İdman.Biz turun doqquz oyunu ilə bağlı əsas məqamları təqdim edir.
“Qalatasaray” – “Kasımpaşa”: 38 oyunluq seriyaya qarşı məğlubiyyətsiz mövsüm; 9 oktyabr, Bakı vaxtı ilə saat 21:00.
“Qalatasaray” tura 13 xalla ikinci, “Kasımpaşa” isə 10 xalla səkkizinci pillədə başlayır.
Favorit aydındır – meydan sahibləri. Amma bu, turun ən təhlükəli oyunlarından biri ola bilər.
“Qalatasaray” çempionatda doğma meydanda artıq 38 oyundur məğlub olmur. “Kasımpaşa” isə bu mövsüm Super Liqada ümumiyyətlə uduzmayan yeganə komandadır: iki qələbə və dörd heç-heçə. Üstəlik, tərəflərin mayda baş tutan son görüşündə “Kasımpaşa” 1:0 hesabı ilə qalib gəlib.
Meydan sahiblərinin heyətlə bağlı problemləri də var. Lesli Uqoçukvu cəzalıdır, baş məşqçi Okan Buruk da texniki zonada yer ala bilməyəcək. Viktor Osimhen, Günay Güvənç, Roland Şallai, Mario Lemina və Vilfrid Sinqonun vəziyyətinə oyun öncəsi son qiymət veriləcək.
“Kasımpaşa”da Kamil Ahmet Çörekçi, Mortada Ben Uanes və Andri Fannar Baldursson meydana çıxa bilməyəcəklər.
Daha bir maraqlı məqam: Osimhen “Kasımpaşa”ya qarşı keçirdiyi iki oyunda dörd qol vurub. Adrian Benedıçak isə artıq “Qalatasaray”ın qapısına yol tapmağı bacarıb.
Proqnoz: “Qalatasaray” favoritdir, amma bu oyun heç də asan keçməyəcək.
“Gençlerbirliyi” – “Amedspor”: lider baş məşqçisiz qalan komandaya qarşı; 10 oktyabr, 14:30.
“Amedspor” 13 xalla sensasiyalı şəkildə liderdir və liderlər arasında ən yaxşı top fərqinə malikdir. “Gençlerbirliyi” isə 7 xalla 13-cü yerdədir.
Ankara klubu mövsümə parlaq başlayıb – “Fənərbağça” və “Göztepe”ni məğlub edib, ardınca “Ərzurumspor”la heç-heçə oynayıb. Lakin sonra üç ardıcıl məğlubiyyət gəlib: “Trabzonspor”a 0:5, “Kasımpaşa”ya 1:2 və “Başakşehir”ə 0:4.
Bundan sonra Metin Diyadin istefa verib. Klub rəhbərliyi əvvəlcə onun istefasını qəbul etmək istəməsə də, mütəxəssis qərarında israr edib və komandadan ayrılıb. Hazırda komandanı Erkin Şimşir oyuna hazırlayır.
“Amedspor” isə əksinə, yüksək əhval-ruhiyyədədir. Besnik Hasinin komandası əvvəlcə “Başakşehir”i 5:0, sonra “Beşiktaş”ı 3:2 hesabı ilə məğlub edib və tarixində ilk dəfə turnir cədvəlinin zirvəsinə yüksəlib.
Komandanın əsas siması Gift Orbandır. Onun hesabında yeddi qol var və o, “Trabzonspor”dan Məhəmməd Salahla birlikdə bombardirlər yarışına başçılıq edir.
Proqnoz: hazırkı formaya görə favorit “Amedspor”dur, amma məşqçi dəyişikliyinin yaratdığı effekt lider üçün oyunu təhlükəli edə bilər.
“Alanyaspor” – “Ərzurumspor”: Azərbaycan üçün xüsusi maraq doğuran oyun; 10 oktyabr, 17:00.
“Alanyaspor” 11 xalla beşinci, “Ərzurumspor” isə 7 xalla 14-cü pillədədir.
Meydan sahibləri mövsümə çox stabil başlayıblar: üç qələbə, iki heç-heçə və cəmi bir məğlubiyyət. Son turda “Alanyaspor” “Çorum”u 2:1 hesabı ilə məğlub edib.
“Ərzurumspor”un vəziyyəti daha mürəkkəbdir. Bununla belə, son iki ev oyununda “Konyaspor” və “Samsunspor” üzərində 1:0 hesablı qələbələr komandanın təhlükəli zonadan uzaqlaşmasına imkan verib.
Azərbaycanlı azarkeşlər üçün əsas maraq Nəriman Axundzadə ilə bağlıdır. Azərbaycan millisinin hücumçusu cari çempionatda üç oyunda meydana çıxıb, ümumilikdə isə təxminən bir saat oynayıb. Son üç turda o, ehtiyatda qalıb. Bu həftə isə Azərbaycan U-21 millisinin Cəbəllütariqə qarşı oyununda 90 dəqiqə meydanda olub.
İndi əsas sual budur: Serkan Özbalta milli komandaların oyunlarından sonrakı fasilədən sonra Nərimana şans verəcəkmi?
Proqnoz: daha stabil oyununa görə “Alanyaspor” favorit görünür.
“Samsunspor” – “Trabzonspor”: Funkun “ilin oyunu” adlandırdığı Qara dəniz qarşılaşması; 10 oktyabr, 17:00.
“Trabzonspor” 10 xalla yeddinci, “Samsunspor” isə 4 xalla 16-cıdır.
Amma bu qarşılaşmada turnir cədvəli hər şeyi ifadə etmir. Bu, ayrıca emosional yükü olan regional qarşıdurmadır.
“Samsunspor”un baş məşqçisi Torsten Funk görüşü az qala “ilin oyunu” adlandırıb və azarkeşlərə müraciət edib: “Bu gənc komandanın sizə ehtiyacı var”. Onun sözlərinə görə, fasilə komandaya müsbət təsir edib və zədələnmiş bir neçə futbolçu sıraya qayıdıb.
“Trabzonspor” fasiləyə “Qalatasaray” üzərində səs-küylü 4:0 hesablı qələbə ilə yollanıb. Tomas Raysın rəhbərliyi altında komanda oyununu yenidən qurmağa çalışır. Fasilə zamanı Jerom Boateng də onun məşqçilər korpusuna qoşulub.
Heyətlə bağlı yaxşı xəbərlər də var. Tim Jabol-Folkarelli və Arseni Bataqov zədələrini sağaldıblar. Umut Nayir və Okay Yokuşlu isə müalicələrini davam etdirirlər.
Tarixi statistikada üstünlük “Trabzonspor”un tərəfindədir: 45 qələbə, “Samsunspor”un 15 qələbəsi və 12 heç-heçə.
Proqnoz: cüzi üstünlük “Trabzonspor”dadır, amma bu, turnir cədvəlinin adi oyunlardan daha az əhəmiyyət daşıdığı görüşlərdəndir.
“Rizespor” – “Fənərbağça”: eyni xal, tam fərqli təzyiq; 10 oktyabr, 20:00.
Hər iki komandanın 10 xalı var. “Fənərbağça” altıncı, “Rizespor” isə doqquzuncu pillədədir.
Ən maraqlı fərq top nisbətindədir: “Fənərbağça”da +10, “Rizespor”da isə +1.
Fasilədən əvvəl İsmail Kartalın komandası “Eyüpspor”u 8:0 hesabı ilə darmadağın edib. Bu, “Fənərbağça”nın Super Liqa tarixində ən böyükhesablı qələbəsidir. Altı turdan sonra İstanbul klubu həm də çempionatın ən məhsuldar komandasıdır – 16 qol.
Qonaqların heyətinə Marko Asensio qayıdır və onun start heyətində meydana çıxacağı gözlənilir. Milan Şkrinyar isə Slovakiya millisində ardıcıl dörd oyun keçirib. Buna görə də Çempionlar Liqasında “Aston Villa” ilə Birmingemdə keçiriləcək qarşılaşma ərəfəsində ona istirahət verilə bilər.
Amma “Rizespor” da əvvəlcədən məğlub hesab ediləcək komanda deyil. Recep Uçar xatırladıb ki, ilk altı turun dördünü komanda səfərdə keçirib, buna baxmayaraq 10 xal toplayıb. Onun “Fənərbağça” ilə oyun öncəsi fikri sadədir: “Məqsədimiz aydındır – hər oyuna qələbə üçün çıxırıq”.
Proqnoz: fərdi ustalıq və hücum potensialına görə “Fənərbağça” favoritdir, amma xal baxımından komandalar hazırda tam bərabərdir.
“Konyaspor” – “Başakşehir”: böhrandan həqiqətən kim çıxıb; 11 oktyabr, 14:30.
“Başakşehir” 7 xalla 12-ci, “Konyaspor” isə 4 xalla 15-ci pillədədir.
Meydan sahibləri mövsümə ağır başlasalar da, fasilədən əvvəl vəziyyətin yaxşılaşdığı hiss olunmağa başlayıb: “Trabzonspor” üzərində 1:0 hesablı qələbə və “Kasımpaşa” ilə 0:0.
İlhan Palut üç həftəlik fasilədən iki yoxlama oyunu keçirmək və futbolçuların bərpası üçün istifadə edib. Enes Destan isə hələ də fərdi proqramla çalışır.
“Başakşehir” də məhz fasilə öncəsi canlanıb. Bir sıra uğursuz nəticələrdən sonra komanda “Gençlerbirliyi”ni 4:0 hesabı ilə darmadağın edib.
“Konyaspor” üçün əsas təhlükələrdən biri Eldor Şomurodovdur. “Başakşehir”in hücumçusu artıq altı qol vurub və bombardirlər yarışının liderlərindən cəmi bir top geri qalır.
Proqnoz: turun ən bərabər oyunlarından biridir. Hücumdakı fərdi keyfiyyətə görə cüzi üstünlük “Başakşehir”dədir.
“Qaziantep” – “Çorum”: Burak Yılmaz öz komandasını qurmağa başlayır; 11 oktyabr, 17:00.
“Qaziantep” 8 xalla 10-cu, “Çorum” isə 7 xalla 11-ci yerdədir.
Komandaları cəmi bir xal ayırır.
“Çorum”da əlavə intriqa baş məşqçi dəyişikliyidir. Burak Yılmaz işə yeni başlayıb və problemi açıq şəkildə ifadə edib: “Yaxşı futbolçularımız var, amma hələ yaxşı komandamız yoxdur”. Onun qarşısında duran əsas vəzifə öz futbol fəlsəfəsini qısa müddətdə komandaya aşılamaqdır.
Super Liqanın debütantı artıq nə qədər təhlükəli ola biləcəyini göstərib: “Eyüpspor” üzərində 3:0, ardınca səfərdə “Samsunspor” üzərində 5:1. Fasilədən əvvəl isə “Alanyaspor”a 1:2 hesablı məğlubiyyət gəlib.
“Qaziantep” oyuna “Kocaelispor”a 0:2 hesablı məğlubiyyətdən sonra çıxacaq və komandanın da reaksiyaya ehtiyacı var.
Proqnoz: demək olar, 50/50. Doğma meydan amili tərəzini bir qədər “Qaziantep”in xeyrinə əyir.
“Beşiktaş” – “Kocaelispor”: üçüncü yerlə dördüncü yer üz-üzə; 11 oktyabr, 20:00.
Hər iki komandanın 12 xalı var. Daha yaxşı top fərqinə görə “Beşiktaş” üçüncü, “Kocaelispor” isə dördüncü pillədədir.
Bu, turun əsas oyunlarından biridir.
Fasilədən əvvəl “Beşiktaş” liderliyə yüksəlmək imkanını əldən verib və “Amedspor”a 2:3 hesabı ilə uduzub. Vinçentso İtalyano komandasının ilk hissəni uğursuz keçirdiyini etiraf edib və “yeni səviyyəyə qalxmaq üçün addım ata bilərdik, amma bunu bacarmadıq” deyib.
İndi isə baş məşqçi üçün yaxşı xəbərlər var. Duşan Vlahoviç tam şəkildə komanda ilə məşqlərə qayıdıb. Leandro Trossard da qrupla çalışır. Orkun Kökçü zədədən sonra məşqlərə qoşulub, hərçənd onun meydana çıxıb-çıxmayacağı hələ tam dəqiqləşməyib.
“Kocaelispor”da isə vəziyyət fərqli olub. Selçuk İnan fasilənin əvvəlində komandanın birdən-birə on zədəli futbolçusunun olduğunu bildirib. Buna görə də milli komandaların oyunları ilə bağlı fasilə klub üçün çox vaxtında gəlib.
Qonaqlar buna baxmayaraq, altı oyundan dördünü qazanıblar və fasilə öncəsi “Qaziantep”i 2:0 hesabı ilə məğlub ediblər.
Proqnoz: doğma meydan və əsas futbolçuların geri qayıtması “Beşiktaş”ı cüzi favorit edir. Amma turnir cədvəlinə baxsaq, bu, tam bərabər rəqiblərin duelidir.
“Eyüpspor” – “Göztepe”: artıq gözləməyə vaxtı olmayanların oyunu; 12 oktyabr, 21:00.
Turun son oyunu birbaşa aşağı pillələrdə qərarlaşan iki komandanı üz-üzə gətirəcək.
“Göztepe” 3 xalla 17-ci yerdədir. “Eyüpspor”un da 3 xalı var, amma daha pis top fərqinə görə sonuncudur.
“Eyüpspor” fasiləyə “Fənərbağça”ya 0:8 hesablı ağır məğlubiyyətdən sonra yollanıb. Bunun ardınca Özkan Pulat istefa verib, komandanın yeni baş məşqçisi isə Mustafa Dalcı təyin olunub.
“Göztepe”nin problemi başqadır: komanda hələ də qələbə qazana bilməyib - üç heç-heçə və üç məğlubiyyət.
Bu qarşılaşmada Azərbaycanla bağlı daha bir məqam var. “Eyüpspor”un heyətində Azərbaycan millisinin sabiq futbolçusu Taşkın İlter çıxış edir. O, sentyabrın əvvəlindən əzələ zədəsindən sonra bərpa olunur və meydana qayıdışının məhz oktyabrda baş tutacağı gözlənilirdi. Hazırda onun bu oyunda iştirakı sual altındadır.
Proqnoz: qüvvələr olduqca bərabərdir. Hazırkı formaya görə “Göztepe” bir qədər üstün görünür, amma yeni baş məşqçi effekti “Eyüpspor”un xeyrinə işləyə bilər.
