“Yenidən bu komandada çıxış etmək mənim üçün xoşdur. Ötən mövsümdə də "Kəpəz"in formasını geyinmişəm”.
Bunu "Kəpəz"in futbolçusu Rauf Hüseynli sport24.az-a müsahibəsində deyib.
Həmin müsahibəni təqdim edirik:
– İlk olaraq Gəncə təmsilçisinə qayıtmağınızla bağlı fikirlərinizi öyrənmək istərdik. Keçid necə baş tutdu?
- Yenidən bu komandada çıxış etmək mənim üçün xoşdur. Ötən mövsümdə də "Kəpəz"in formasını geyinmişəm. Hər iki tərəf istədi və mən geri qayıtdım.
– Komandanın cari mövsümdəki çıxışını necə qiymətləndirirsiniz? Sizcə, uğursuz nəticənin əsas səbəbi nədir?
- Səbəbini mən də bilmirəm. Düşünürəm ki, yaxşı komandamız var. Yaxşı oyunçulara da malikik. Kollektivdə əhval-ruhiyyə də qaydasındadır.
- Azərbaycan Kubokunda böyükhesablı qələbə qazandınız. II Liqada çıxış edən "Ağstafa Gəncləri"ni 6:1 hesabı ilə məğlub etmək sizə motivasiya verir?
- Hər qalibiyyət komandaya təsir edir və motivasiya verir. Ümid edirəm ki, qarşıdakı matçlarda da qələbələrə nail olacağıq.
- Bu gün Misli Premyer Liqasında "Neftçi"nin qonağı olacaqsınız. Oyun haqqında nə deyə bilərsiniz?
- Çətin qarşılaşma olacaq. Rəqibdə təhlükəli və keyfiyyətli futbolçular çoxdur. Biz əlimizdən gələni edəcəyik. Sonadək döyüşəcəyik, maksimum nəticə qazanmağa çalışacağıq.
- Necə düşünürsüz, "Kəpəz" liqada qalması üçün nə etməlidir?
- Komanda olaraq üzərimizdə çox çalışmalıyıq. Hər matçda son saniyəyədək mübarizə aparmalıyıq. Təslim olmaq lazım deyil. Bütün bunları bacarsaq, yaxşı nəticələr əldə edəcəyik.
