Madridin “Atletiko” futbol klubu “Real”ın futbolçusu Federiko Valverdenin zədədən gözlənilməz dərəcədə tez sağalmasına istehzalı münasibət bildirib.
İdman.Biz xəbər verir ki, oktyabrın 9-da 28 yaşlı uruqvaylı futbolçunun ümumi qrupla məşqlərə qayıtdığı və “Vilyareal”la oyun üçün “Real”ın heyətinə daxil edildiyi məlum olub.
Daha əvvəl Valverdenin İspaniya La Liqasının yeddinci turunda “Atletiko”ya qarşı keçirilən Madrid derbisindən (1:2) sonra sol topuq bağlarının üçüncü dərəcəli dartılmasından əziyyət çəkdiyi bildirilmişdi.
Belə zədələrdən sonra bərpa müddəti adətən ay yarımdan üç aya qədər davam edir. Lakin “Real”ın yarımmüdafiəçisi cəmi 18 gün ərzində sıraya qayıdıb.
Bu vəziyyət “Atletiko”nun istehzalı reaksiyasına səbəb olub.
“Dünya tibb ictimaiyyətinin 100 faizinin yanıldığını sübut edərək tarix yazmağa davam etdiyi üçün “Real”ı təbrik etmək istəyirik”, - deyə “Atletiko”nun mətbuat xidmətinin X sosial şəbəkəsindəki paylaşımında bildirilib.
Beləliklə, Valverdenin gözləniləndən tez sağalması Madrid klubları arasında növbəti söz atışmasına səbəb olub.
