UEFA, Şimali, Mərkəzi Amerika və Karib hövzəsi Futbol Konfederasiyası (KONKAKAF) və Asiya Futbol Konfederasiyası (AFC) FIFA Forward Enterprise layihəsi ilə bağlı birgə bəyanat yayıb.
İdman.Biz xəbər verir ki, üç konfederasiya FIFA ilə bağlı təşəbbüslə əlaqəli halların tam müstəqil auditdən keçirilməsini tələb edib.
Daha əvvəl FIFA dünya çempionatları ilə bağlı hüquqlara özəl investorların cəlb edilməsini nəzərdə tutan kommersiya strukturunun yaradılmasını nəzərdən keçirib. Layihə sonradan qitə konfederasiyaları ilə yaranan ciddi fikir ayrılıqları fonunda dayandırılıb.
UEFA, KONKAKAF və AFC birgə bəyanatlarında mövqelərinin maliyyə vəsaitlərinin bölüşdürülməsi və ya turnirlərin genişləndirilməsi ilə bağlı daha əvvəl qəbul edilmiş qərarlarla əlaqəli olmadığını vurğulayıblar.
“Bu, pulla bağlı deyil. Konfederasiyalar artıq FIFA-nın böyük maliyyə ehtiyatlarının üzv assosiasiyaların inkişafına investisiyaların artırılması üçün məsuliyyətli şəkildə bölüşdürülməsinə çağırış edib”, - deyə bəyanatda bildirilib.
Təşkilatlar həmçinin yarışların genişləndirilməsi, dünya çempionatlarından əldə olunan gəlirlərin bölüşdürülməsi və 2030 və 2034-cü il dünya çempionatlarına ev sahibliyi hüququnun ölkələrə verilməsi ilə bağlı qərarları şübhə altına almadıqlarını qeyd ediblər.
Bununla belə, konfederasiyalar dünya çempionatına özəl investorların cəlb edilməsi ideyasını sərt şəkildə tənqid ediblər.
“Dünya çempionatında pay satmaq cəhdi vəziyyətin qiymətləndirilməsində ciddi səhv idi. Bu, sadəcə prosedur səhvi deyil, FIFA-nın xidmət etməli olduğu institutlara inamın fundamental şəkildə pozulması idi”, - deyə bəyanatda vurğulanıb.
UEFA, KONKAKAF və AFC hesab edir ki, araşdırma FIFA-nın özü, onun əməkdaşları və ya futbolda marağı olan digər tərəflər tərəfindən aparılmamalıdır. Onların fikrincə, araşdırma tam müstəqil üçüncü tərəfə həvalə edilməlidir.
Konfederasiyalar FIFA daxilində qərarların qəbul edilməsi qaydası və təşkilat rəhbərliyinin son görüşlərində iştirak edən şəxslərin tərkibi ilə bağlı da narahatlıqlarını bildiriblər.
“Orada ki, məsuliyyət olmalıdır, sükut hökm sürür, şəffaflığın olması lazım gələn yerdə isə tərəflər üçün məsafə var. Bunlar futbolun rəhbərliyindən gözlənilən keyfiyyətlər deyil”, - deyə bəyanatda qeyd olunub.
