İngiltərənin “Mançester Siti” futbol komandasının hücumçusu Erlinq Holandın gələcəkdə “Barselona”ya keçməsi ilə bağlı müzakirələr yenidən gündəmə gəlib.
İdman.Biz xəbər verir ki, “Real” və “Mançester Siti”nin sabiq futbolçusu Stiv Makmanaman GOAL-a açıqlamasında belə bir transferin mümkünlüyünü şərh edib.
“Hamıda Holandın İspaniyada oynamaq istədiyi ilə bağlı bir təsəvvür var. Bəlkə də belə olacaq. Ancaq “Barselona”nın onu almağa maliyyə imkanının olub-olmaması başqa sualdır. Ola bilər ki, onlar uzunmüddətli plan qururlar”, - Makmanaman deyib.
Norveçli hücumçunun “Mançester Siti” ilə müqaviləsi 2034-cü ilə qədərdir. O, İngiltərə klubunun heyətində 200 matçda 162 qol vurub.
Makmanaman “Barselona”nın Robert Levandovski və Ferran Torresin gedişindən sonra klassik mərkəz hücumçusuna ehtiyac duyduğunu da vurğulayıb.
