Xorvatiya millisinin və İspaniyanın “Barselona” futbol klubunun sabiq yarımmüdafiəçisi İvan Rakitiç Rodri Ernandesin Kataloniya təmsilçisinə transferini yüksək qiymətləndirib.
İdman.Biz xəbər verir ki, Rakitiç İspaniya millisinin kapitanının “Barselona”ya keçidinin təkcə klub üçün deyil, bütün ölkə futbolu üçün əhəmiyyətli olduğunu bildirib.
“Düşünürəm ki, bu, təkcə bizim üçün, “Barselona” üçün deyil, İspaniya futbolu üçün də böyük və vacib gündür. Referans səviyyəli futbolçu geri qayıdır. Milli komandada, bəlkə də daha iki-üç oyunçu ilə birlikdə, ən vacib futbolçudur, liderdir. Onun İspaniya çempionatına qayıtması vacibdir və təbii ki, “Barselona”da olması daha yaxşıdır”, - deyə Rakitiç söyləyib.
Rakitiç Rodrinin öz mövqeyində dünyanın ən güclü futbolçularından biri olduğunu vurğulayıb:
“Dünyanın bütün komandaları Rodrini heyətində görmək istəyərdi. O, müdafiə ilə hücumu birləşdirməyi bacaran son dərəcə ağıllı futbolçudur. Üstəlik, liderlik xüsusiyyəti çox güclüdür. Karyerasının ən yaxşı dövründə və ideal yaşındadır. Ümid edirəm ki, mən altı il “Barselona”dan necə zövq aldımsa, klub da ondan elə zövq alacaq”.
Xorvatiyalı keçmiş futbolçu “Barselona”nın hazırkı yarımmüdafiə xəttini də yüksək qiymətləndirib. Onun sözlərinə görə, Pedri, Rodri, Frenki de Yonq, Qavi, Mark Bernal, Fermin Lopes və Dani Olmodan ibarət seçim komandaya böyük üstünlük verir:
“Əslində, bu, demək olar ki, İspaniya millisinin əsas yarımmüdafiə xəttidir. Üstəlik, balanslıdır. Zədə olsa belə, komandanın güclü alternativləri var. Pedri barədə danışmağa ehtiyac yoxdur. Qavi güclü şəkildə geri qayıdıb, gənc futbolçular da inkişaf edəcəklər. Frenkinin də tezliklə bərpa olunacağına ümid edirəm”.
Rakitiç Rodri ilə Serxio Buskets arasında aparılan müqayisələrə də toxunub:
“Busketsin tam eynisi yoxdur və heç vaxt olmayacaq. Rodri fərqli futbolçudur. Amma onun çox yaxşı etdiyi şey oyunu başa düşməkdir. Matçı oxumağı, komandasının nəyə ehtiyac duyduğunu və rəqibə harada zərbə vurmağı çox yaxşı bilir. Öz mövqeyində çox komplekt futbolçudur”.
Rakitiç hesab edir ki, Rodrinin İngiltərə Premyer Liqasında çıxış etməsi və Pep Qvardiola ilə işləməsi onun inkişafında mühüm rol oynayıb:
“İllər ərzində çox inkişaf edib. İngiltərə Premyer Liqasına keçidi onun üçün çox vacib oldu. Pep Qvardiolanın yanında olması da əhəmiyyətli idi. Əvvəllər çatışmayan bəzi xırda detalları orada inkişaf etdirdi və bu, onun oyununu tamamladı”.
Sonda Rakitiç “Barselona” rəhbərliyini transferə görə təbrik edib:
“Mən həmişə deyirəm ki, ən yaxşı futbolçular “Barselona”da olmalıdır. Rodri də ən yaxşılardan biridir, bəlkə də ən yaxşısıdır. Prezidentimizi və bu transferi mümkün edən bütün rəhbərləri təbrik edirəm”.
Rodri avqustun 18-də “Mançester Siti”dən “Barselona”ya keçib və Kataloniya klubu ilə 2030-cu ilin yayına qədər müqavilə imzalayıb.
