UEFA, Şimali və Mərkəzi Amerika və Karib Hövzəsi Futbol Konfederasiyası (KONKAKAF) və Asiya Futbol Konfederasiyası (AFC) FIFA prezidenti Canni İnfantinonun dünya çempionatının yayım hüquqlarının bir hissəsini özəl investorlara satmaq planı ilə bağlı fəaliyyətinin müstəqil şəkildə araşdırılmasını tələb edib.
İdman.Biz xəbər verir ki, bu barədə hər üç futbol qurumunun birgə dərc etdiyi bəyanatda deyilir.
“Tövsiyə olunan hüquqların bir hissəsinin özəl investorlara satılması” planına münasibət bildirən təşkilatlar bununla bağlı müstəqil yoxlamanın aparılmasını istəyiblər.
“Futbol dünyada ən böyük ortaq ehtirasdır. O, heç bir şəxsə və ya quruma məxsus deyil. Futbolçulara, azarkeşlərə, klublara və federasiyalara məxsusdur. İnsan ona səlahiyyət verən kollektivdən özünü üstün tutduqda, üzərinə düşən öhdəliyi yerinə yetirməmiş olur”, – deyə birgə bəyanatda bildirilib.
Təşkilatlar araşdırmanın tamamilə müstəqil üçüncü tərəf tərəfindən aparılmasını tələb ediblər.
Onların fikrincə, müəyyən nəticələrdə maraqlı ola biləcək FIFA-nın özünün araşdırmanı həyata keçirməsi düzgün deyil.
