Portuqaliya millisi Kriştianu Ronaldunun yığmadakı karyerasını başa vurmasından sonra ilk oyununda son 12 ilin ən ağır məğlubiyyətini alıb.
İdman.Biz xəbər verir ki, komanda UEFA Millətlər Liqasının beşinci turunda Danimarkaya doğma meydanda 1:4 hesabı ilə uduzub. Braqada keçirilən qarşılaşma portuqaliyalıların 2014-cü ildən bəri üç və ya daha çox top fərqi ilə ilk məğlubiyyəti olub.
Portuqaliya sonuncu dəfə 2014-cü il iyunun 16-da dünya çempionatının qrup mərhələsində Almaniyaya 0:4 hesabı ilə məğlub olmuşdu. Həmin görüşdə Tomas Müller het-trik etmiş, portuqaliyalı müdafiəçi Pepe isə 37-ci dəqiqədə qırmızı vərəqə almışdı.
Danimarka ilə görüşdə Pyer-Emil Höybierq hesabı açıb, Rasmus Hoylund iki dəfə fərqlənib, Yoakim Andersen isə qonaqların dördüncü qolunu vurub. Portuqaliyanın yeganə qolunun müəllifi Bernardu Silva olub.
Qeyd edək ki, Ronaldu noyabrın əvvəlində milli komandadakı karyerasını başa vurduğunu açıqlayıb. Portuqaliya yığması Danimarka ilə qarşılaşmaya qədər Millətlər Liqasının cari mövsümündə keçirdiyi dörd oyunun hamısında qalib gəlib.
