Çempionlar Liqasının üçüncü turunda London “Çelsi”si ilə Amsterdamın “Ayaks” klubunun oyunu yekunlaşıb.
İdman.Biz-in məlumatına görə, qarşılaşma Londondakı "Stemford Bric"də baş tutub.
Qonaqlar 15-ci dəqiqədən - Kennet Taylor meydandan qovulduqdan sonra bir nəfər azlıqda qalıblar.
18-ci dəqiqədə Mark Qiu hesabı açıb, 27-ci dəqiqədə Moyses Kaysedo fərqi ikiyə çatdırıb, 33-cü dəqiqədə Vaut Veqorst penaltini dəqiq yerinə yetirərək hesab arasındakı fərqi azaldıb. Daha sonra meydan sahiblərindən Enzo Fernandes (45) və Estevao (45+6) penaltiləri qola çeviriblər, Tayrik Corc (48) matça son nöqtəni qoyub.
Bu qələbədən sonra “Çelsi”nin 6 xalı var və o, Çempionlar Liqasının turnir cədvəlinin ortasındadır. “Ayaks” xalı olmadığı üçün cədvəlin sonuncu pilləsində qərarlaşıb.
Növbəti turda noyabrın 5-də “Çelsi” səfərdə “Qarabağ”la qarşılaşacaq, “Ayaks” isə “Qalatasaray”ı qəbul edəcək.
