Kişi voleybolunda “Xilasedici” klubu doğma meydanda məğlub olduğu Portuqaliyanın “Sportinq” komandasından revanş almağa çalışacağı bir vaxtda Azərbaycanın daha bir təmsilçisi Avropa arenasına çıxacaq. “Ordu” voleybolçuları tarixlərində ilk dəfə avrokuboklarda mübarizə aparacaqlar. Bakı təmsilçisi bu debütə təkcə uğurlu mövsümdən sonra deyil, dünya voleybolunda tanınmış adların yer aldığı heyətlə hazırlaşır.
İdman.Biz xəbər verir ki, uzun müddət çempionluq titullarından uzaq qalan “Ordu” 2025/2026 mövsümündə yenidən diqqət mərkəzinə düşərək Azərbaycan çempionatının gümüş medalını qazanıb. Finalda “Xilasedici”yə 1:3 hesabı ilə məğlub olan komanda ikinci yeri tutmaqla CEV Çelenc Kubokuna vəsiqə əldə edib.
Heyətə nəzər saldıqda görünür ki, “Ordu” turnirdə sadəcə debütant rolunda çıxış etmək niyyətində deyil. Baş məşqçi Cavid Süleymanovun sərəncamında beynəlxalq arenada ciddi təcrübəyə malik bir neçə voleybolçu var.
Komandanın ən məşhur oyunçularından biri italiyalı İvan Zaytsevdır. O, 2016-cı il Rio-de-Janeyro Yay Olimpiya Oyunlarının gümüş, 2012-ci il London Olimpiadasının isə bürünc medalçısıdır. Zaytsev həm diaqonal hücumçu, həm də hücumçu mövqeyində oynaya bilir.
Polşalı hücumçu Mixal Kubyakın da uğurları kifayət qədər çoxdur. O, Polşa millisinin heyətində 2014 və 2018-ci illərdə iki dəfə dünya çempionu olub. Həmçinin uzun müddət milli komandanın kapitanı kimi çıxış edib.
Digər təcrübəli legioner isə finlandiyalı libero Lauri Kerminendir. O, Rusiyanın “Kuzbass” və Moskva “Dinamo”su komandalarında çıxış etməsi ilə tanınır. Kerminenin əsas üstünlükləri topqəbuletmə və müdafiə oyunudur.
Bakı təmsilçisinin heyətində Kuba-Almaniya voleybolçusu Salvador İdalqo Oliva da yer alıb. O, karyerası ərzində Almaniya, Türkiyə və Yunanıstan çempionatlarında çıxış edib, o cümlədən “Olimpiakos”un formasını geyinib.
Tanınmış yeni transferlər Azərbaycan klubu ilə Avropa debütünə hazırlaşdıqları bir vaxtda “Ordu” ölkə çempionatında da gücünü göstərməyi bacarıb. Cavid Süleymanovun rəhbərlik etdiyi kollektiv ilk üç matçının hamısında 3:0 hesabı ilə qalib gəlib. Bakı komandası “Murov Az Terminal”, “Neftçi” və “Azərreyl”dən üstün olub. Beləliklə, üç turdan sonra doqquz xalla turnir cədvəlinə başçılıq edən “Ordu” setlərin nisbətində də ideal göstəriciyə malikdir – 9:0.
“Ordu”nun CEV Çelenc Kubokundakı rəqibi Norveçin “Forde” komandası olacaq. Bu klub üçün Avropa arenasında çıxış etmək yenilik deyil. Norveç təmsilçisinin ölkə daxilində də zəngin tarixi var. Komanda altı dəfə ölkə çempionatının müntəzəm mövsümünün qalibi olub. Sonuncu dəfə bu uğura 2026-cı ildə imza atıb. Bundan başqa, altı dəfə ölkə kubokunu qazanıb. 2011-ci ildə isə Şimali Avropa çempionluğunu əldə edib.
“Forde” avrokuboklarda bir neçə dəfə CEV Çelenc Kubokunda, həmçinin 2018/2019 mövsümündə CEV Kubokunda iştirak edib. Xüsusilə sonuncu turnirdəki çıxışı klub tarixinin diqqətçəkən səhifələrindən biridir. Norveçlilər 1/32 finalda Ukraynanın Xmelnitski şəhərini təmsil edən “Novator” klubunu mübarizədən kənarlaşdırıblar. Lakin növbəti mərhələdə digər Norveç təmsilçisi, Bergenin “Vikinq” komandasına məğlub olublar.
“Forde” hazırkı mövsümədək sonuncu dəfə 2023-cü ilin payızında avrokuboklarda çıxış edib. Həmin vaxt CEV Çelenc Kubokunda Serbiyanın Subotitsa şəhərini təmsil edən “Spartak”la qarşılaşıb. Hər iki görüş serblərin 3:0 hesablı qələbəsi ilə başa çatıb. Beləliklə, Norveç klubu turnirdə bir set belə qazana bilmədən mübarizəni dayandırıb.
Bakı təmsilçisi ilə qarşıdakı oyun yalnız idman mübarizəsi baxımından deyil, maraqlı ailə əlaqəsinə görə də diqqət çəkir. Belə ki, “Ordu”nun hazırkı hücumçusu Mixal Kubyak vaxtilə böyük qardaşı Blaşey Kubyakın çıxış etdiyi kluba qarşı oynayacaq. Blaşey 2012/2013 və 2013/2014 mövsümlərində “Forde”nin formasını geyinib və toppaylayıcı mövqeyində çıxış edib.
Norveç təmsilçisi avrokuboklara ölkə çempionatının yüksək divizionunda keçirdiyi üç oyundan sonra yollanır. Komandanın hesabında iki qələbə, bir məğlubiyyət, altı xal və 7:5 set nisbəti var. “Forde” mövsümə “Tromse”yə 1:3 hesablı məğlubiyyətlə başlayıb. Daha sonra səfərdə “Vikinq”i, doğma meydanda isə “Koll”u eyni – 3:1 hesabı ilə məğlub edib.
Rəqib komandada diqqət yetirilməli oyunçular arasında diaqonal hücumçu Oskar Raftevold, hücumçu Matias Loftesnes, orta blokçu Brage Noqva və boyu 210 santimetr olan gənc hücumçu Sturla Nühammer Mürxol yer alır.
Beləliklə, “Ordu” Avropa debütünə tanınmış oyunçulardan ibarət heyət və ölkə çempionatındakı uğurlu startla yollanır. “Forde”nin üstünlüyü isə beynəlxalq oyun təcrübəsi və komanda kimi daha yaxşı uyğunlaşmasıdır. Bakı təmsilçisi üçün əsas sınaq təkcə Norveç klubu ilə mübarizə aparmaq deyil, həm də ulduzlardan ibarət heyətin Avropa səviyyəsində nə qədər tez vahid komandaya çevrilə biləcəyini göstərmək olacaq.
Xatırladaq ki, komandalar arasında ilk oyun bu gün, noyabrın 11-də Norveçdə keçiriləcək və Bakı vaxtı ilə saat 22:30-da başlayacaq. Cavab qarşılaşması isə noyabrın 19-da Bakıda, Gənclər və İdman Nazirliyinin Voleybol Mərkəzində təşkil olunacaq. Görüş saat 18:00-da start götürəcək.
İki oyunun nəticəsinə əsasən qalib gələn komanda CEV Çelenc Kubokunun 1/16 finalına yüksələcək. Bu mərhələdə onu Niderlandın “Simplex SSS” klubu gözləyir. Məğlub tərəf üçün isə avrokubok mövsümü başa çatacaq.
