Gənclər və idman naziri Fərid Qayıbov idman mediasının nümayəndələri ilə görüşdə federasiyaların legionerləri cəlb etməsinə münasibət bildirib.
İdman.Biz xəbər verir ki, nazir fikrini idman mediasının nümayəndələri ilə görüşdə dilə gətirib.
F.Qayıbov xatırladıb ki, bu tendensiya təkcə Azərbaycanda deyil, idmanda böyük nəticələr qazanan ölkələrdə də da geniş yayılıb.
Nazirin sözlərinə görə, şəxsən onların əsas məqsədi yerli idmançıların yetişdirilməsidir və bəzi idman növlərində artıq legionerlərin sayının azaldılması istiqamətində müsbət nəticələr əldə olunub.
Fərid Qayıbov batut gimnastikasını nümunə göstərərək, bu sahədə artıq uğurların olduğunu vurğulayıb.
Nazir eyni zamanda bəzi idman növlərində uzun illərdir xaricdən dəvət olunan idmançıların çıxış etməsinin onu narahat etdiyini bildirib.
O əlavə edib ki, federasiyalar legionerlərin milliləşdirilməsi ilə bağlı hələ də müraciətlər edirlər.
Açıq şəkildə problemin əsas səbəblərindən birinin ağır çəkili idmançıların çatışmazlığı olduğunu deyən Fərid Qayıbov, komanda yarışlarında legionerlərin iştirakının bəzən labüd olduğunu qeyd edib.
Gənclər və idman naziri yeni idman növlərində, xüsusilə qış idman növlərində xaricdən idmançı dəvət edilməsinin başa düşülən olduğunu, lakin artıq bu sahədə də şərait yaradıldığını və yerli idmançıların yetişməsi üçün zamana ehtiyac olduğunu diqqətə çatdırıb.
