ABŞ-li UFC döyüşçüsü Brendan Allen UFC Vegas 122 turnirinin əsas döyüşündə qalib gəlib.
İdman.Biz xəbər verir ki, 30 yaşlı idmançı Las-Veqasdakı “Meta Apex” arenasında orta çəki dərəcəsində ingiltərəli Kristian Leroy Dankanla qarşılaşıb. Beş raundluq görüş Allenin boğucu fəndlə qələbəsi ilə bitib. Dankan beşinci raundun başlanmasından iki dəqiqə 46 saniyə sonra təslim olub.
Həlledici raundda Allen rəqibini qəfəsin kənarında yerə yıxıb, arxasına keçib və arxadan boğucu fənd tətbiq edib. Dankan fənddən çıxmağa çalışsa da, bunu bacarmayıb.
Döyüş gərgin keçib. Dankan ayaqüstə mübarizədə daha uğurlu olub, Allen isə parterdə üstünlük qazanıb. İkinci raundda rəqibinin gözünə barmaq vurduğuna görə Dankandan bir xal çıxılıb.
“O, düşündüyümdən də möhkəm çıxdı, amma işimi gördüm”, - deyə Allen döyüşdən sonra bildirib.
Bu nəticədən sonra Allenin peşəkar karyerasındakı göstəricisi 28 qələbə, yeddi məğlubiyyət olub. O, UFC-də dalbadal dördüncü döyüşünü qazanıb.
Dankan üçün bu, UFC turnirində ilk əsas döyüş olub. İngiltərəli idmançının beş döyüşlük qalibiyyət seriyası qırılıb, onun göstəricisi 15 qələbə, üç məğlubiyyətdir.
