Oktyabrın 11-dən 12-nə keçən gecə Rio-de-Janeyroda Mütləq Döyüş Çempionatının(UFC) turniri keçiriləcək. Turnirin əsas hadisəsi braziliyalı döyüşçü Çarlz Oliveyranın rinqə qayıdışı olacaq.
İdman.Biz-in məlumatına görə, onun rəqibi polşalı Mateuş Qamrot olacaq.
Halbuki əvvəlcə bu döyüş azərbaycanlı idmançı Rafael Fiziyevlə keçirilməli idi. Məhz o, Oliveyranın rəqibi kimi təyin edilmişdi, lakin hazırlıq prosesi zamanı aldığı zədə səbəbindən Fiziyev oktaqona çıxa bilməyəcək.
Mütəxəssislərin fikrincə, bu amil gecənin əsas döyüşünün nəticəsinə həlledici təsir göstərə bilər. Belə ki, Qamrot döyüşə cəmi üç həftə qalmış əvəzləyici kimi rinqə çıxmağa razılıq verib və bu, onun tam hazırlıq keçməsinə imkan verməyib. Güclü zərbələri və mükəmməl tay boks texnikası ilə tanınan Fiziyev isə Oliveyra üçün qat-qat təhlükəli rəqib ola bilərdi.
Hazırda favorit hesab olunan braziliyalı Çarlz Oliveyra İliya Topuriyadan aldığı ağır nokautdan sonra döyüş arenalarına qayıdır. Lakin baş tutmayan Fiziyevlə döyüşün həyəcanı hələ də bu turnirin üzərində dolaşır — axı məhz azərbaycanlı döyüşçü Oliveyranın əsas rəqibi olmalı idi.
Xatırladaq ki, Mütləq Döyüş Çempionatının (UFC) yüngül çəki dərəcəsində çıxış edən döyüşçü Rafael Fiziyev sentyabrın 20-də zədələnib. 32 yaşlı döyüşçü UFC-nin yüngül çəki dərəcəsi reytinqində 11-ci yeri tutur. Onun hesabında 13 qələbə və dörd məğlubiyyət var.
