“Ferrari”nin pilotu Luis Hamilton "Formula-1"-də uğursuz nəticələrin onda yaratdığı məyusluqdan danışıb.
İdman.Biz "RaceFans"a istinadən xəbər verir ki, britaniyalı pilot yarış həftəsonunun istənilən kimi alınmamasının nə qədər çətin olduğunu vurğulayıb və "Formula-1"-i qolfla müqayisə edib.
“Biz ofisdəyik, hər şeyimizi veririk, bütün məlumatları analiz edirik. O qədər müxtəlif mərhələlərdən keçirsən, nəfəsinə, qidalanmana, vaxt bölgüsünə, ürək döyüntünə diqqət yetirirsən. Sonra isə trasda səhvlər baş verir və ya nəsə səni yaxalayır. Bu, dəhşətli dərəcədə məyusedicidir. "Formula-1" və qolf, ehtimal ki, mümkün olan ən məyusedici iki idman növüdür”, - deyə Hamilton bildirib.
Hamilton yaxşı nəticənin isə bütün bu mənfi hissləri geridə qoyduğunu bildirib.
“Nəhayət sakitləşəndə, hər şey qaydaya düşəndə, hər şey rəvan gedəndə və bu gün olduğu kimi nəticə əldə edəndə, bu, həqiqətən də əladır. Bu, sanki özünəinamı gücləndirir. Uğursuzluğa düçar olduğun bütün o anlar bəzən səni şübhə etməyə vadar edir. Lakin ətrafında nə baş verməsindən asılı olmayaraq, sadəcə inanmağa davam edirsən. Və bu, nəhayət gəlib çatanda, belə düşünürsən: “Görürsənmi? Bilirdim ki, məndə bu alınacaq”. Bu, əla hissdir”, - britaniyalı pilot əlavə edib.
