“Mercedes” “Formula-1” komandasının baş icraçı direktoru Totto Volfs gələn həftə keçiriləcək Azərbaycan Qran-Prisində iştirak etməyəcək.
İdman.Biz "GPblog"a istinadən xəbər verir ki, 54 yaşlı avstriyalı mütəxəssis Bakıya gəlməyəcək və yarışı uzaqdan izləyəcək.
“Mercedes” “Formula-1” mövsümünün Azərbaycan mərhələsində mühüm bir dövrə qədəm qoyur. Lakin komanda bunu Volfsun qarajdakı ənənəvi yerində olmadığı şəraitdə edəcək. Onu Azərbaycanda komandanın rəhbərinin müavini Bredli Lord əvəz edəcək.
Volfsun zaman-zaman Qran-Prini buraxması qeyri-adi hal deyil. Xüsusilə Lord kimi etibarlı əvəzləyicinin olması buna imkan verir. Məsələn, avstriyalı mütəxəssis bu mövsüm Yaponiyada keçirilən Qran-Pridə də iştirak etməyib. Həmin vaxt onun yarışda olmamasının xüsusi səbəbi də açıqlanmayıb.
“Mercedes” Bakıda mövsümün sonuna doğru keçiriləcək üç ardıcıl yarış seriyasının ilk mərhələsinə başlayacaq. Volfs əvvəlcədən komandasını xəbərdar edib ki, məhz bu mərhələdə çox şey dəyişə bilər. Onun sözlərinə görə, etibarlılıq, hazırlıq və yarış həftəsonlarında düzgün icra getdikcə daha böyük əhəmiyyət kəsb edir.
Volfs həmçinin qeyd edib ki, “Mercedes” bu mərhələ ərzində çempionatdakı mövqeyini həm möhkəmləndirə, həm də itirə bilər. O özü isə bu mühüm dövrün ilk qarşılaşmasını yerində, yaxından izləyə bilməyəcək.
