"Bizim üçün çətin oyun olacaq"
Bunu İdman.bizə "Linkoln"un hücumçusu Li Kasyaro deyib.
Cəbəllütariq təmsilçisinin 42 yaşlı futbolçusu Çempionlar Liqasının II təsnifat mərhələsində “Qarabağ”la matçı dəyərləndirib. O bildirib ki, Azərbaycan çempionu ilə ötən mövsüm də oynadıqlarından komandanı yaxşı tanıyır: "Qarabağ"da yaxşı futbolçular var. Düzü, konkret bir ad çəkə bilmərəm. Mən əsasən, orta sahənin oyunçularına və müdafiəçilərə diqqət edirəm. "Qarabağ"ın bir neçə cinah futbolçusu var ki, çox sürətlidirlər, bizə problem yaradırlar. Bir sözlə, əvvəllər də Azərbaycan çempionu ilə oynadığımız üçün komanda haqqında müəyyən təsəvvürümüz var. Bilirik ki, çətin oyun olacaq. İstənilən halda, nəticə əldə etmək üçün motivasiya ilə oynayacağıq".
Qeyd edək ki, "Qarabağ" - "Linkoln" görüşü bu gün saat 20:00-da Tofiq Bəhramov adına Respublika stadionunda keçiriləcək. Bu komandalar arasında Cəbəllütariqdə baş tutan ilk matç Ağdam klubunun 2:0 hesablı qələbəsi ilə yekunlaşıb.
Aytac Sahəd
İdman.biz
