İspaniyanın "Barselona" klubu Çempionlar Liqasının əsas mərhələsinin beşinci turunda Azərbaycanın "Sabah" komandası ilə keçirəcəyi oyun ərəfəsində xoşagəlməz xəbərlə üzləşib.
İdman.Biz "Mundo Deportivo" nəşrinə istinadən xəbər verir ki, kataloniyalıların 29 yaşlı yarımmüdafiəçisi Frenki de Yonq belində yaranan narahatlıq səbəbindən Niderland millisinin düşərgəsini vaxtından əvvəl tərk edib.
Futbolçu UEFA Millətlər Liqasında Yunanıstana qarşı keçirilən və 7:0 hesabı ilə başa çatan matça start heyətində çıxsa da, fasilədə əvəzlənib. Məlum olub ki, de Yonq hələ qarşılaşmadan əvvəl millinin baş məşqçisi Xavi Ernandesə belindəki problemlər barədə məlumat verib.
Əvvəlcə mütəxəssis futbolçunun vəziyyətinin ciddi narahatlıq doğurmadığını bildirsə də, sonradan yığmanın tibbi heyəti risk etməmək qərarına gəlib. Nəticədə de Yonq noyabrın 16-da Almaniyaya qarşı keçiriləcək oyunu buraxacaq və vaxtından əvvəl "Barselona"nın düşərgəsinə qayıdacaq.
Vəziyyət müəyyən narahatlıq doğurur. Belə ki, niderlandlı yarımmüdafiəçi 2026-cı il dünya çempionatında aldığı diz zədəsindən yalnız bu yaxınlarda sağalıb. Həmin zədə səbəbindən mövsümün başlanğıcını buraxan futbolçu meydana yalnız oktyabrın sonunda qayıdıb.
İspaniya nəşrinin məlumatına görə, de Yonqun noyabrın 22-də La Liqada "Vilyarreal"a qarşı keçiriləcək matçda iştirak edəcəyi gözlənilir. Bununla belə, yekun qərar onun fiziki vəziyyətindən asılı olacaq.
Xatırladaq ki, "Sabah" noyabrın 25-də Bakı Olimpiya Stadionunda "Barselona"nı qəbul edəcək. Çempionlar Liqasının əsas mərhələsinin beşinci turunun görüşü Bakı vaxtı ilə saat 21:45-də başlayacaq.
Dörd turdan sonra Azərbaycan təmsilçisinin aktivində üç, Kataloniya klubunun isə doqquz xalı var.
