Bakının “Sabah” futbol klubunun müdafiəçisi Timoteuş Puxaç UEFA Millətlər Liqasının qarşıdakı oyunları üçün Polşa millisinin heyətinə çağırılıb.
İdman.Biz xəbər verir ki, Polşa millisinin baş məşqçisi Yan Urban 27 yaşlı futbolçunu sentyabr-oktyabr toplanışının heyətinə daxil edib.
Beləliklə, Timoteuş Puxaç təxminən iki ildən sonra Polşa millisinin heyətinə qayıdıb. Müdafiəçi sonuncu dəfə 2024-cü il noyabrın 18-də Millətlər Liqasının Şotlandiyaya qarşı oyununda (1:2) milli formanı geyinib. Həmin qarşılaşmada meydana sonradan daxil olan futbolçu 27 dəqiqə oynayıb.
Timoteuş Puxaç Polşa millisində ümumilikdə 15 oyuna çıxıb. O, yığmada debütünü 2021-ci il iyunun 1-də Rusiya ilə yoxlama görüşündə (1:1) edib. Daha sonra futbolçu Polşa millisinin AVRO-2020-də keçirdiyi üç oyunun hamısında iştirak edib. Müdafiəçi, həmçinin 2024-cü il Avropa çempionatının heyətində yer alıb.
Qeyd edək ki, Timoteuş Puxaç “Sabah”ın əsas futbolçularından biridir. O, Bakı klubu ilə Azərbaycan çempionu olub və komandanın Çempionlar Liqasının əsas mərhələsinə yüksəlməsinə kömək edib. Müdafiəçi turnirin ilk turunda “Mançester Yunayted”ə qarşı “Old Trafford” stadionunda keçirilən səfər matçında (0:4) 90 dəqiqə meydanda olub.
Timoteuş Puxaç bir neçə gün əvvəl Polşa millisinin məşqçilər korpusunun nümayəndələrinin onunla əlaqə saxladığını və çıxışlarını izlədiyini açıqlamışdı.
Polşa millisi qarşıdakı toplanış çərçivəsində Millətlər Liqasında 4 oyun keçirəcək. Sentyabrın 25-də Bosniya və Herseqovinanı qəbul edəcək komanda, 28-də səfərdə İsveçlə, oktyabrın 2-də evdə Rumıniya ilə qarşılaşacaq. Oktyabrın 5-də isə Bosniya və Herseqovina ilə cavab oyununa Zeniçada çıxacaq.
