“Qarabağ” Azərbaycanın güclü klublarından biridir. Lakin Çempionlar Liqasında “Ayntraxt” kimi yüksək səviyyəli və təcrübəli komandaya qarşı oynamaq onlar üçün asan olmayacaq”.
Bunu Almaniyalı idman eksperti Norbert Raeder AZƏRTAC-a müsahibəsində deyib.
O, bu gün UEFA Çempionlar Liqasının əsas mərhələsinin yeddinci turunda keçiriləcək “Qarabağ” və “Ayntraxt” oyunu barədə danışıb.
Həmin müsahibəni təqdim edirik.
- “Qarabağ” UEFA Çempionlar Liqasının əsas mərhələsinin yeddinci turunda Bakıda “Ayntraxt”ı qəbul edəcək. Komandaların şanslarını necə dəyərləndirirsiniz?
- “Qarabağ” Azərbaycanın güclü klublarından biridir. Lakin Çempionlar Liqasında “Ayntraxt” kimi yüksək səviyyəli və təcrübəli komandaya qarşı oynamaq onlar üçün asan olmayacaq. Frankfurt təmsilçisi beynəlxalq arenada kifayət qədər oyun keçirib. Məncə, bu qarşılaşmada favorit bizim komandadır. Bununla belə, “Qarabağ” sürpriz edə, oyunu gərgin və maraqlı mübarizə şəraitində keçirə bilər. Matçın Bundesliqa klubunun xeyrinə başa çatacağını düşünürəm.
- “Qarabağ”ın indiyədək keçirdiyi oyunları izləmisinizmi?
- “Çelsi” ilə heç-heçə etdikləri oyunu və son olaraq “Ayaks”la qarşılaşmanı icmal şəklində izləmişəm.
- Azərbaycan futbolu barədə hansı məlumatlara sahibsiniz?
- Çempionlar Liqasında “Qarabağ”ın beynəlxalq arenada çox tanınan fərdi ulduz futbolçuları yoxdur. Komanda daha çox ayrı-ayrı futbolçularla deyil, kollektiv oyun və güclü komanda ruhu ilə seçilir.
- Baş məşqçi Qurban Qurbanov haqqında nə deyə bilərsiniz?
- Usta mütəxəssisdir və Azərbaycanın ən uğurlu baş məşqçilərindən biridir. O, “Qarabağ”a dəfələrlə ölkə çempionluğunu qazandırıb.
- Həmyerliniz Berti Foqts vaxtilə Azərbaycan millisinin baş məşqçisi olub...
- Bildiyimə görə, Berti Foqts 2008-2014-cü illərdə Azərbaycan millisində çalışıb. Onun fəaliyyəti birmənalı qarşılanmayıb. Komandaya təcrübə gətirsə də, nəticələr məhdud sayda oldu və yığma böyük turnirlərə vəsiqə qazana bilmədi. Ümumilikdə, müsbət cəhətlər olsa da, nəticələrə görə tənqidlər də var idi.
- Almaniyada azarkeşi olduğunuz klub varmı?
- Əsl berlinli olaraq, futbol baxımından “Herta”, “Union”, eləcə də “Raynikendorfer Füçse Berlin” klubları mənə çox yaxındır. Almaniyadan Azərbaycana səmimi salamlarımı göndərirəm.
Maraqlı və baxımlı oyun arzulayıram. Qoy güclü olan qalib gəlsin və bütün futbolçular sağlam qalsın.
