Azərbaycan şahmatçılarından heç biri mükafat fondu 855 min dollar olan nüfuzlu “Grand Swiss” turnirində ilk onluda deyil.
İdman.biz-in məlumatına görə, Özbəkistanın Səmərqənd şəhərində keçirilən yarışda Şəhriyar Məmmədyarov Anton Demçenko (Sloveniya) ilə bərabərə qalıb və 4,5 xalla 17-ci yerə düşüb.
Rauf Məmmədov (3,5 xal) və Məhəmməd Muradlı (1,5 xal) yeddinci turda uduzaraq müvafiq olaraq 61-ci və 115-ci yerlərə eniblər. Qeyd edək ki, Muradlı artıq dördüncü oyununda məğlub olur.
Aydın Süleymanlı hesabat turunda bərabərə qalıb və 3,5 xalla 53-cü yerdədir.
Turnir cədvəlinə hərəyə 5,5 xal toplayan Matias Blubaum (Almaniya) və Sarin Nihal (Hindistan) başçılıq edirlər.
Qadınların yarışında isə titullu Marina Muzıçuk (Ukrayna) və keçmiş rusiyalı Aleksandra Kostenyuk (İsveçrə) üzərində qələbədən sonra beşinci turda lider olan Ülviyyə Fətəliyeva ardıcıl ikinci dəfə məğlub olub və 4 xalla 12-ci pilləyədək geriləyib.
Xanım Balacayeva və Gövhər Beydullayeva isə qalib gəliblər. Onlar 4 və 2,5 xalla müvafiq olaraq 14-cü və 44-cü yerləri tuturlar.
Qadınların yarışında isə Katerina Laqno (FİDE) 5,5 xalla liderdir.
İdman.biz
