Beynəlxalq Şahmat Federasiyası (FİDE) Səmərqənddə keçirilən Ümumdünya Şahmat Olimpiadası zamanı yerləşdirmə problemi ilə üzləşən komandaların yaşayış xərclərini kompensasiya edəcək.
İdman.Biz xəbər verir ki, yarışın bəzi iştirakçıları şəhərdə otaqları öz hesablarına kirayələməyə məcbur qalıblar. FİDE federasiyalara üç günədək olan dövr üçün xərcləri ödəməyə hazır olduğunu açıqlayıb.
Bununla belə, iştirakçıların yerləşdirilməsi məsələləri yerli təşkilat komitəsinin səlahiyyətinə daxildir. FİDE isə zərərçəkmiş komandalara əlavə maliyyə yardımı göstərmək qərarına gəlib.
“Bundan əlavə, Olimpiada zamanı FİDE tərəfindən təsdiq edilmiş standartlara cavab verməyən rəsmi otellərdə qalmağa məcbur olacaq bütün komandalar FİDE-dən əlavə kompensasiya ödənişi alacaqlar”, – deyə təşkilatın açıqlamasında bildirilib.
Qeyd edək ki, 46-cı Ümumdünya Şahmat Olimpiadası Səmərqənddə keçirilir. Yarışlar İsveçrə sistemi üzrə 11 turda təşkil olunur və sentyabrın 27-də başa çatacaq.
