Azərbaycan Futbol Federasiyaları Assosiasiyasının (AFFA) prezidenti Rövşən Nəcəf Bakıda keçirilən FIFA U-15 Dünya Çempionatı və Festivalı çərçivəsində Hövsan Yarış Kompleksini ziyarət edib.
İdman.Biz xəbər verir ki, federasiya rəhbəri Azərbaycan və Andorra milliləri arasında keçirilən qarşılaşmanı tribunadan izləyib.
Millimizin 1:0 hesablı qələbəsi oyunu canlı izləyən valideynlər və federasiya nümayəndələri tərəfindən böyük sevinclə qarşılanıb.
Rövşən Nəcəf səfər zamanı kompleksin infrastrukturu, iştirakçılar üçün yaradılan şərait və qarşılaşmaların müxtəlif hava şəraitində təşkili məqsədilə görülən hazırlıq işləri ilə də maraqlanıb.
Qeyd edək ki, Hövsan Yarış Kompleksinin infrastrukturu eyni vaxtda 20 oyunun keçirilməsinə imkan verir. Hər meydançada gün ərzində 10-dək qarşılaşmanın təşkili nəzərdə tutulub. Yeni quraşdırılan peşəkar işıqlandırma sistemləri isə matçların axşam saatlarında da keçirilməsini təmin edir.
Turnir müxtəlif ölkələrdən olan yeniyetmə futbolçulara beynəlxalq yarış təcrübəsi qazanmaq, bacarıqlarını nümayiş etdirmək və fərqli futbol məktəblərinin nümayəndələri ilə qarşılaşmaq imkanı yaradır.
Xatırladaq ki, Azərbaycan millisi dünya çempionatına Timor-Leste üzərində 6:0 hesablı qələbə ilə başlayıb. Yığma ikinci oyununda isə Andorranı 1:0 hesabı ilə məğlub edib.
FIFA U-15 Dünya Çempionatı və Festivalı oktyabrın 30-da başa çatacaq. Turnirin son qarşılaşmaları Bakı Kristal Zalında keçiriləcək.
