Dünən, avqustun 29-da İtaliya B Seriyasının ikinci turunda “Sampdoriya” ilə “Yuve Stabiya” arasında keçirilən matçın 87-ci dəqiqəsində 18 yaşlı Lorenzo Mezzotero meydana çıxıb. Genuya təmsilçisinin baş məşqçisi Bernardo Korradi onu meydan sahiblərinin yeganə qolunun müəllifi Cennaro Tutino əvəzinə oyuna buraxıb.
“Sampdoriya” həmin vaxt 1:2 hesabı ilə geridə idi və sonda məğlubiyyətdən xilas ola bilmədi. Lakin “Luici Ferraris” stadionundakı axşam Mezzotero üçün tarixi oldu: 39 nömrəli hücumçu klubun əsas komandasında ilk dəfə meydana çıxdı və B Seriyasında debüt etdi.
İdman.Biz xəbər verir ki, “Sampdoriya”nın italyan soyadlı debütantının qeyri-adi futbol hekayəsi var. Mezzotero Azərbaycan vətəndaşlığına malikdir, gənclər millimizin heyətində çıxış edib və qol da vurub. Lakin futbolçunun azərbaycanlı kökləri yoxdur.
Lorenzo 16 avqust 2008-ci ildə İtaliyanın Monza şəhərində anadan olub. Erkən uşaqlıq illərini Kanadada keçirib və dörd yaşında orada futbolla məşğul olmağa başlayıb. Buna görə bəzi nəşrlər səhvən Kanadanı onun doğulduğu yer kimi göstərirlər.
2014-cü ildə ailə Bakıya köçüb. Futbolçunun atası Sercio Mezzotero SOCAR-da müqavilə əsasında çalışan italiyalı mühəndis olub. Lorenzonun anasının adı və milliyyəti açıq mənbələrdə göstərilmir. Onun azərbaycanlı mənşəli olduğunu təsdiqləyən məlumat da yoxdur.
Beləliklə, Mezzoteronun ölkəmizlə bağlılığı mənşə ilə deyil, Azərbaycanda keçirdiyi altı illə yaranıb. O, məhz burada böyüyüb, məktəbə gedib, dostlar qazanıb və ilk ciddi futbol təhsilini alıb.
2020-ci ildə Sercio Mezzoteronun SOCAR-la müqaviləsi başa çatıb və ailə İtaliyaya qayıdıb. Həmin vaxt hücumçunun atası oğlunun Azərbaycan pasportunun olmadığını açıq şəkildə bildirib, eyni zamanda yığmadan dəvət gələcəyi təqdirdə ailənin bundan məmnun qalacağını söyləyib.
Sənədlər daha sonra rəsmiləşdirilib. Futbolçunun sözlərinə görə, proses uzun çəkib, lakin sonda AFFA məsələnin həllinə kömək edib. 2026-cı ilin mayına qədər bütün lazımi rəsmiləşdirmələr tamamlanıb və Mezzotero Azərbaycanın U-21 millisinə dəvət alıb.
Bakıda ilk qollar
Lorenzo Azərbaycana altı yaşında gəlib. İlk futbol addımlarını “Qarabağ”ın uşaq komandalarında atıb, daha sonra bir müddət “Leon”da məşq edib, 2017-ci ildən isə “Neftçi”nin akademiyasında çıxış etməyə başlayıb.
Ucaboy mərkəz hücumçusu məhz “ağ-qaralar”ın heyətində yüksək məhsuldarlığı ilə seçilib. O, çempionluq yaşayıb, uşaq turnirlərinin ən yaxşı bombardiri və ən yaxşı futbolçusu seçilib. 2018-ci ildə Mezzotero ənənəvi “Milan günləri” beynəlxalq toplanışına dəvət olunub və İtaliya klubunun mütəxəssisləri onun potensialını yüksək qiymətləndiriblər.
Həmin ilin dekabrında “Neftçi” 10 yaşlı forvardla müqaviləni 2022-ci ilin fevralınadək uzadıb. Sazişin şərtlərinə əsasən, o, Azərbaycan ərazisində yalnız Bakı klubunda çıxış edə bilərdi. Lakin Lorenzo müqavilə müddətini başa vura bilməyib: atasının Azərbaycandakı işi yekunlaşdığı üçün ailə 2020-ci ilin yayında ölkəni tərk edib.
Mezzotero bu gün də “Neftçi”ni böyüdüyü klub adlandırır. O, komandanın nəticələrini izləyir, akademiyadakı insanlarla əlaqələrini qoruyur və dostlarını görmək üçün Bakıya gəlir. Futbolçu Azərbaycan dilini də müəyyən qədər bilir.
İtaliya, zədə və İspaniyada yeni başlanğıc
İtaliyaya qayıtdıqdan sonra Mezzotero Romanın “Latsio” klubu ilə əməkdaşlıq edən “Vigor Milano” akademiyasına qoşulub. Bir il sonra nəticəli hücumçunu ölkənin ən güclü futbol məktəblərindən birinə malik “Atalanta” dəvət edib.
Lakin məhz həmin dövrdə onun inkişafı az qala dayanıb. Lorenzoda Osgood-Schlatter xəstəliyi — sürətlə böyüyən yeniyetmələrdə tez-tez rast gəlinən ağrılı diz problemi aşkarlanıb. Hücumçu təxminən altı ay futbol oynamayıb və sağaldıqdan sonra karyerasında yeni mərhələyə başlamaq qərarına gəlib.
O, Barselonaya yollanaraq “Marcet” akademiyasına daxil olub. İspaniyadakı dövr Mezzoteroya formasını bərpa etməyə və yenidən peşəkar klubların diqqətini cəlb etməyə kömək edib. 2024-cü ilin yayında onunla “Sampdoriya” müqavilə bağlayıb.
Azərbaycanlı futbolçu əvvəlcə U-17 komandasında çıxış edib və çempionatın 20 oyununda 9 qol vurub. Daha sonra onu yuxarı yaş qrupuna keçiriblər. Mezzotero 2025/26 mövsümündə Genuya klubunun gənclər komandasında keçirdiyi 31 qarşılaşmada 13 qol və iki məhsuldar ötürmə ilə yadda qalıb.
Təxminən 190 santimetr boya malik Lorenzo klassik mərkəz hücumçusudur. O, özünü təkcə qol vurmalı deyil, həm də komanda yoldaşlarına kömək etməli olan “doqquz nömrə” adlandırır. Mezzoteronun uşaqlıqdan sevimli futbolçusu braziliyalı Ronaldo olub, müasir oyunçular arasında isə Paulo Dibalanı xüsusilə fərqləndirir.
Azərbaycan millisində debüt matçında qol
Mezzotero 2026-cı ilin mayında ilk dəfə Azərbaycanın U-21 millisinə dəvət olunub. O, qərar qəbul edərkən uzun müddət düşünmədiyini və böyüdüyü ölkəni həmişə təmsil etmək istədiyini bildirib.
İyunun 6-da hücumçu Bəhreynə qarşı yoxlama görüşündə U-21 millimizin heyətində debüt edib. Lorenzo 89-cu dəqiqədə Azərbaycan yığmasının son qolunu vurub və komanda 3:0 hesablı qələbə qazanıb.
Əsas milli komandamızın baş məşqçisi Ayxan Abbasov bundan sonra Mezzoteronun diqqət mərkəzində qalacağını açıqlayıb. Mütəxəssisin sözlərinə görə, U-21 yığmasının məşqçiləri forvardın İtaliyadakı çıxışlarını izləyib və oyununu müsbət qiymətləndiriblər.
Maraqlıdır ki, may ayında verdiyi müsahibədə Lorenzodan “Sampdoriya”nın əsas komandasında mümkün debütü barədə də soruşulub. O, bunun üçün hər gün çalışdığını və şans yarananda hazır olacağını deyib. Üç ay sonra həmin şans həqiqətən də yaranıb.
Hələlik söhbət yalnız bir qısa əvəzetmədən gedir və Mezzoteronu indidən yeni ulduz elan etmək tezdir. Ancaq başqa bir məqam diqqət çəkir: məşqçi 18 yaşlı forvardı taleyi həll olunmuş qarşılaşmada deyil, “Sampdoriya”nın 1:2 hesabı ilə geridə olduğu və matçı xilas etməyə çalışdığı anda meydana buraxıb.
Bakının uşaq komandalarında başlayan yol Lorenzo Mezzoteronu artıq İtaliyanın ən tanınmış klublarından birinin heyətində meydana çıxmağa aparıb. İndi azərbaycanlı hücumçunun əsas vəzifəsi böyüklər futbolunda möhkəmlənmək və debüt dəqiqələrini B Seriyasındakı müntəzəm çıxışlara çevirməkdir.
